ދަތް އުނގުޅުމަކީ ދަތް ހަލާކުވުމާއި، ޕްލެކް އާއި ކާއެތިކޮޅުކޮޅާއި ބެކްޓީރިއާ ނައްތާލުމަށް އެހީތެރިވެދޭ ކަމެކެވެ. އާންމުކޮށް، ދުވާލަކު މަދުވެގެން ދެފަހަރު ދަތްއުނގުޅަންޖެހޭ އިރު ފްލޫރައިޑް ދަތް އުނގުޅާ ބޭހެއް ބޭނުން ކުރުން މުހިންމެވެ.

ބޭސް ލައިގެން ދަތް އުނގުޅުމަށްފަހު އަހަރުމެންގެ ތެރެއިން ގިނަ މީހުން ފެން ލައިގެން ރަނގަޅަށް ކޯ ދޮވެލައި ބޭސްތައް ފިލުވައިލުމެވެ. އެހެން ނަމަވެސް އެއީ މުޅިން ރަނގަޅު ގޮތް ނޫން ކަމަށް ކަމާބެހޭ ތަޖުރިބާކާރުން ބުނެއެވެ. 

އެގޮތުން، ދާދިފަހުން ދާރިސް ޓީވީން ގެނެސްދިން ސިއްޙަތު ޕްރޮގްރާމުގައި، ދަތުގެ ޚާއްޞަ ޑޮކްޓަރ އިލްހާމް ޝަރީފް ވިދާޅުވީ، އަހަރެމެން ދަތް އުނގުޅަނީ ދަތް އުނގުޅާ ބޭސް، ދަތުގައި ހޭކުމަށް ކަމަށެވެ.

ޑޮކްޓަރ އިތުރަށް ވިދާޅުވީ، ދަތް އުނގުޅުމަށްފަހު ފެނުން ކޯ ނުދޮންނާތީ އުނދަގޫ ވާނަމަ، ކުޑަ ފެންފޮދަކުން ކޯ ދޮވެވިދާނެ ކަމަށެވެ. އެހެން ނަމަވެސް މާބޮޑަށް އަނގަ ދޮވެ ސާފު ކޮށްލުމުން، އަނގައިގައި ހޭކިފައިހުރި ދަތް އުނގުޅާ ބޭސްތައް ދޮވެވިގެންދާ ކަމަށާ، އޭގެ ސަބަބުން، ”އެބްސޯބް ވާންޖެހޭ ހުރިހާ މިނަރަލްސްއެއް ދަތުން ބޭރުވެގެންދާ“ ކަމަށެވެ. 

ޑޮކްޓަރ ވިދާޅުވީ ދަތް އުނގުޅަނީ ހަމައެކަނި ދަތް ސާފު ކުރަން ނޫން ކަމަށާ، ދަތް އުނގުޅުމުގެ ސަބަބުން ދަތަށް ބޭނުންވާ މިނަރަލްސްވެސް ލިބޭކަން ޔަގީން ކުރުމަށް ކަމަށެވެ. އެހެން ކަމުން ދަތް އުނގުޅާފައި ރަނގަޅަށް ކޯ ދޮވުމަކީ ކުރަންޖެހޭ ކަމެއް ނޫން ކަމަށް ވިދާޅުވިއެވެ.