ޕީޕަލްސް ނެޝަނަލް ކޮންގްރެސް (ޕީއެންސީ)ގެ އަމާޒަކީ އެޕާޓީގެ މެމްބަރުންގެ އަދަދު އެއްސަތޭކަހާހަށް އެރުވުންކަމަށް އެޕާޓީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ޕީއެންސީގެ އިންތިހާބާ ގުޅޭގޮތުން ނޫސްވެރިންނާ ވާހަކަދައްކަވަމުން އަދުރޭ ވިދާޅުވީ، ޕީއެންސީގެ މެމްބަރަކަށް ވުމަށް ފުރާފައި ހުރި ސައްހަ ފޯމްތަކުގެ އަދަދު 96،000 ހަށްވުރެ ގިނަވާނޭކަމަށެވެ. އެގޮތުން އަމާޒަކީ ޕީއެންސީގެ މެމްބަރުންގެ އދަދަު އެއް ލައްކައަށް އިތުރުކުރުންކަމަށް އަދުރޭ ވިދާޅުވިއެވެ. ރައްޔިތުން މަޖިލީހުގެ ރައީސްކަމުގެ މަގާމުވެސް ފުރުއްވަމުން ގެންދަވާ އަދުރޭ ވިދާޅުވީ، ޕީއެންސީއަށް މެމްބަރުން އިތުރުކުރުމަށް ރައީސުލްޖުމްހޫރިއްޔާ ޑރ.މުހައެްމަދު މުއިއްޒު ކަނޑައަޅުއްވާފައިވާ އަމާޒަށް ވާސިލްވެފައިވާކަމަށެވެ.

ޕީއެންސީގެ އަމާޒަކީ އެޕާޓީއަކީ ރާއްޖޭގައި އެންމެފުރަތަމަ ޕާޓީއަކަށް އެއްލައްކަ މީހުން ހަމަކުރާ ފުރަތަމަ ޕާޓީއަށް ހެދުންކަަށް އަދުރޭ ފާހަގަކުރެއްވިއެވެ. ޕީއެންސީއަށް މެމްބަރުން އިތުރުކުރުމަށް ގިނަ މަސައްކަތްތަކެއް ކުރެވިފައިވާކަން ފާހަގަކުރައްވަމުން އަދުރޭ ވިދާޅުވީ، ކުރުމުއްދަތެއްގެ ތެރޭގައި މިހާގިނަ އަދަދެއްގެ މީހުން ޕާޓީއާ ގުޅުމަކީ ލިބިގެންދިޔަ ވަރަށްބޮޑު ކުރިއެރުމެއް ކަމަށެވެ.

Advertisement

ޕީއެންސީގެ އެތެރޭގެ އިންތިހާބު މިއަދު ކުރިއަށްދާއިރު، މި އިންތިހާބުގައި ރާއްޖޭގެ އެކި ސަރަހައްދުތަކުން ޖުމްލަ 1984 މަގާމަށް 648 ކެނޑިޑޭޓުން ވާދަކުރެއެވެ. އިންތިހާބުގައި ޖުމްލަ 144 ވޯޓުފޮށި ބަހައްޓާފައިވާއިރު، ވޯޓުލުމުގެ ހައްގު ލިބިގެންވާ މީހުންގެ އަދަދު 33،500 އަރާކަމަށް ޕީއެންސީން ބުނެއެވެ.