ހައްދުންމަތީ ފޮނަދޫގައި ޝޮޕިންގް ކޮމްޕްލެކްސްއެއް ތަރައްޤީކޮށް ހިންގައިދޭނެ ފަރާތެއް ހޯދުމަށް އެރަށު ކައުންސިލުން އިއުލާނުކޮށްފިއެވެ.
ފޮނަދޫ ކައުންސިލުން މިހާރު ވަނީ އެރަށުގައި ޝޮޕިން ކޮމްޕްލެކްސްއެއް ހިންގުމަށް ބޭނުންވާ ބިން ކުއްޔަށް ދޫކުރުމަށް ހުޅުވާލާފައެވެ. ފޮނަދޫ ކައުންސިލުން ކޮށްފައިވާ އިއުލާނަށް ބަލާއިރު، ޝޮޕިންކޮމްޕްލެކްސް ތަރައްޤީކުރުމަށް ނިންމާފައިވަނީ، 15،000 އަކަފޫޓުގެ ބިމެއްގައެވެ. އެ ބިން އޮންނަނީ ދަ ޖެމްކިޗަންގެ ދެކުނުން ބޮޑުތަކުރުފާނުމަގުގެ ހުޅަނގުން ބޮޑުމަގުގެ އުތުރުންނެވެ.
ޝޮޕިންކޮމްޕްލެކްސް ތަރައްޤީކުރަން ޖެހެނީ ކައުންސިލުން ފޯރުކޮށްދޭ މަޢުލޫމާތާއި އެއްގޮތަށް އަމިއްލަ ތަކެތީގައެވެ. ފޮނަދޫ ކައުްނސިލުން ބުނީ އެކަމަށް ޝައުގުވެރިވާ ފަރާތްތަކުން އަންނަ ޑިސެމްބަރުމަހުގެ ދޭއް ވާ ހޯމަދުވަހުގެ 13:00 ގެ ކުރިން ރަޖިސްޓްރީވެ ބިޑު ޑޮކިއުމެންޓް ގަތުމަށް ފައިސާ ދެއްކުމަށް އެދޭކަމަށެވެ. ޝޮޕިންކޮމްޕްލެކްސް އެޅުމުގެ ފުރުސަތު ދެވޭނީ ހަމައެކަނި ދިވެހިން ހިއްސާވާ ކުންފުނިތަކަށް އެކަނިކަމަށްވެސް ކައުންސިލުން ބުނެއެވެ.
ހައްދުންމަތީ ފޮނަދޫ އަކީ ސަރުކާރުން އާބަން ސެންޓަރެއްގެ ގޮތުގައި ތަރައްޤީކުރުމަށް ނިންމާފައިވާ ރަށެކެވެ.
Advertisement
This content is created and paid for by advertisers and does not involve Voice Journalists
