ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އަށް އެކި ފަރާތްތަކުން ނުދައްކާ ހުރި 1.4 ބިލިއަން ރުފިޔާގެ ތެރެއިން 226 މިލިއަން ރުފިޔާ މިހާތަނަށް ހޯދާފައިވާކަމަށް އެ ކޯޕަރޭޝަންގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވެއްޖެއެވެ.

މިއަދު ބޭއްވި ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި ވާހަކަފުޅު ދައްކަވަމުން ފަޒުލް ވިދާޅުވީ، އެޗްޑީސީ އާއި ހަވާލުވިއިރު، އެ ކޯޕަރޭޝަނުން ދޫކޮށްފައިވާ ބިންތަކަށް އެކި ވިޔަފާރިތަކުން ނުދައްކާ 1.4 ބިލިއަން ރުފިޔާ އޮތް ކަަމަށެވެ.

އެފަދަ މައްސަލަތައް ބެލުމަށް ޚާއްސަ ކޮމިޓީއެއް އެކުލަވާލިކަން ފާހަގަކުރައްވާ ފަޒުލް ވިދާޅުވީ، ކޮމިޓީގެ މަސައްކަތުން މިހާތަނަށް 226 މިލިއަން ރުފިޔާ ހޯދާފައިވާކަމަށެވެ.

Advertisement

ފަޒުލް ވިދާޅުވީ، ފައިސާ ނުދައްކާ ހުރި ފަރާތްތަކަށް "ޑިމާންޑް ލެޓާ" އެއް ފޮނުވަމުންދާ ކަމަށާއި، އެ ނޯޓިސްއަށް އިޖާބަ ނުދޭނަަމަ، މައްސަލަ ކޯޓު މަރުހަލާއަށް ގެންދާ ކަމަށެވެ.

އެހެންނަމަވެސް، ފައިސާ ދައްކަން ބޭނުންވެއްޖެ ހާލަތެއްގައި ފުރުސަތު ދިނުމަށް ނިންމާފައިވާކަން ފާހަގަކުރައްވާ ފަޒުލް ވިދާޅުވީ، އެއްބަސްވެވޭ މުއްދަތެއްގައި ފައިސާ ދައްކާ ފަރާތަށްވެސް އުދަނގޫ ނުވާނެހެން އެކި މަރުހަލާއަށް ބަހާލައިގެން ފައިސާ ދެއްކުމުގެ ފުރުސަތު އެބައޮތްކަމަށާއި، މިއީ ކޯޓު މަރުހަލާ އެއްކައިރި ކުރުމަށްދޭ ފުރުސަތެއް ކަމަށެވެ.

ވޮއިސްއަށް މައުލޫމާތު ލިބިފައިވާ ގޮތުގައި އެޗްޑީސީއަށް ވިޔަފާރީގެ ގޮތުން އަންނަން ހުރި ފައިސާ އިތުރުވެފައިވަނީ ކޮވިޑަށްފަހުއެވެ. ކޮވިޑަށްފަހު އެޗްޑީސީން ވިޔަފާރީގެ ބޭނުމަށް ދޫކޮށްފައިވާ އިމާރާތްތަކާއި ބިމުކުލިން ލިބެންޖެހޭ ގިނަ އަދަދެއްގެ ފައިސާ ހުރީ ނުލިބިއެވެ.