ކޯސްތަކުން ފާސްވުމަށް ކޮންޓްރޯލްޑް އެސެސްމަންޓްތަކުން 50 އިންސައްތަ ހޯދަންޖެހޭ ގޮތަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ހަދައިފިއެވެ.

އެމްކިއުއޭއިން ޕްރޮގްރާމް އެކްރެޑިޓޭޝަން ގައިޑްލައިނަށް ގެނައި އިސްލާހުގައިވާގޮތުން، 50 އިންސައްތަ ކޮންޓްރޯލްޑް އެސެސްމަންޓް ގައި ހިމެނޭ ކޮންމެ ބަޔަކުން ފާސްވުމަށް ވަނީ ލާޒިމްކޮށްފައެވެ.

މިގޮތުން، މިފަދަ އެސެސްމަންޓްތަށް ކުރިއަށްގެންދަންވާނީ "ގައިޑްލައިންސް ފޮރ ޕްރޮގްރާމް އެކްރެޑިޓޭޝަން"އާއި އެއްގޮތްވާގޮތުގެ މަތިންކަމަށާއި، މަތީ ތަޢުލީމުދޭ މަރުކަޒުތަކަށް ކުރިން އެޕްރޫވަލް ދެވިފައިވާ ކޯސްތަށް ކުރިއަށްގެންދިޔުމުގައި، މި ގައިޑްލައިންއަށް ގެނެސްފައިވާ ބަދަލަށް ޢަމަލުކުރުމަށް އެމްކިއުއޭއިން ވަނީ އަންގާފައެވެ.

މީގެ އިތުރުން އޯޕަން ބުކް ޓެސްޓުތައް ހެދުމަށް ވަގުތެއް ކަނޑައަޅަން ޖެހޭގޮތަށް އުސޫލުގައި ބަޔާންކޮށްފައިވާއިރު، އެސެސްމަންޓްތަކުގައި ހިމެނިދާނެ ބައިތައްވެސް ވަނީ ފާހަގަކޮށްފައެވެ.

މިއުސޫލު ބުނާގޮތުން، އެސެސްމަންޓުތައް ތައްޔާރުކުރުމުގައި ތިންވަނަ މީހެއްގެ އެހީތެރިކަން ނުވަތަ ބައިވެރިވުން މަދުކުރުމަށް، އެއްވެސް މޮޑިއުލަކުން ހުރިހާ އެސެސްމަންޓެއް ގޭގައި ހެދުމުގެ ފުރުސަތު ދީގެން ނުވާނެއެވެ.

2021 ގައި އަމަލު ކުރަން ފެށި މަތީ ތައުލީމުގެ ގާނޫނުގައިވާގޮތުން، ތައުލީމު ފޯރުކޮށްދޭ މަރުކަޒެއްގައި ތައުލީމު ހާސިލުކުރަމުންދާ ދަރިވަރަކު އަމިއްލައަށް ފުރިހަމަކުރަންޖެހޭ މަސައްކަތެއް އެހެން މީހަކު ލައްވައި ކުރުވައިފިނަމަ 5000 ރުފިޔާއިން އެ ދަރިވަރަކު ޖޫރިމަނާ ކުރެވޭނެއެވެ. އަދި އެފަދަ މަސައްކަތްތައް ކޮށްދޭ މީހުން 10،000 ރުފިޔާއިންއިން ޖޫރިމަނާ ކުރެވޭނެއެވެ.