ހިޔާ ފުލެޓުގައި އިތުރަށް ހަރުކުރާ 32 ލިފްޓަށް 18 މިލިއަން ޑޮލަރު (278 މިލިއަން ރުފިޔާ) އަށްވުރެ ގިނައިން ޚަރަދުވާ ކަމަށް ހައުސިން ޑިވޮލަޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވެއްޖެ އެވެ.
އިއްޔެ ކުރިއަށްދިޔަ، ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި ހަނިމާދޫ މެންބަރު އަބްދުލް ޣަފޫރު ވަނީ ހިޔާ ފުލެޓް ތަކުގައި ހަރުކުރަން ނިންމާފައިވާ، ލިފްޓަށް 18 މިލިއަން ޑޮލަރަށް ގަނެފައިވާ ކަމަށް ދެކެވޭ ވާހަކަތަކަކީ ތެދެއްތޯ ސުވާލު ކުރައްވާފައެވެ.
”18 މިލިއަން ކޮންމެވެސް ވަރެއް. އެއީ އެންމެ ލިފްޓެއްގެ އަގެއް ނޫން. އެއީ ހިޔާގެ ހުރިހާ ލިފްޓު ތަކެއް. 32 ލިފްޓް.“ މެންބަރުގެ ސުވާލަށް ޖަވާބު ދެއްވަމުން ފަޒުލް ވިދާޅުވިއެވެ.
މިއާއެކު ފަޒުލް ވިދާޅުވީ، އެ ލިފްޓްތައް ހަރުކުރުމުގެ ޕްރޮޖްކެޓް މިހާރު ކުރިއަށް ގެންދާ ކަމަށާ، ކޮންމެ ޓަވަރަކު ދެ ލިފްޓް ހަރުކުރަންޖެހޭ ކަމަށެވެ.
ހިޔާ ފްލެޓުގައި އިތުރު ލިފްޓު ހަރުކުރުމުގެ މަސައްކަތް ހަވާލުކޮށްފައި ވަނީ މިކަމުގެ ތަޖުރިބާ ހުރި ޗައިނާގެ ކުންފުންޏެއް ކަމަށްވާ ޝެންޔަންގް ޔުއާންޑް އިންޓެލެކްޗުއަލް ގުރޫޕާއެވެ.
މި މަޝްރޫޢުގެ ދަށުން، ކޮންމެ ފްލެޓަކަށް އިތުރު ޕެސެންޖަރ އަދި ސްޓްރެޗަރ ލިފްޓެއް ހަރުކުރެވޭނެ ކަމަށް މީގެ ކުރިން އެޗްޑީސީން ބުންޏެވެ. އެގޮތުން ޕެސެންޖަރ ލިފްޓުގައި 14 މީހުންގެ ޖާގަ އޮންނާނެ ކަމަށްވެސް ބުންޏެވެ.
މި މަސައްކަތް ފެބްރުއަރީ މަހުގައި ހަވާލު ކުރެވުނީ، އެއް އަހަރު ދުވަހުގެ ތެރޭގައި ނިންމާ ގޮތަށެވެ.
Advertisement
This content is created and paid for by advertisers and does not involve Voice Journalists
