މާރުކޭޓް ސަރަހައްދަށް މިއަދުގޮސް އެތަނުގައި ހުރި ގޮޅިއެއްގައި ވިއްކަން ބަހައްޓާފައި ހުރި އިޒްރާއީލް ފަޅޯތަކެއްގެ އަގު ސޭޓްކައިރީ އަހާލުމުން ސޭޓް ވަރަށް ރުޅިއައިސްގެން ބުންޏެވެ. "މިއީ މިހާރު ފަލަސްތީނުފަޅޯ ނުވަތަ މޮޅު ފަޅޯ. އަހަރުމެން ނޫޅެން މިއަކަށް އިޒްރާއީލް ފަޅޯ ކިޔާކަށް" ގޮޅީގައި އިން މީހާ ވަރަށް ރުޅިގަދަވެފައި ބުންޏެވެ.

ތެދެކެވެ. އިޒްރާއީލްގެ ނިރުބަވެރި ސިފައިން ފަލަސްތީނުގެ އާއްމު ރައްޔިތުންނާ ދެކޮޅަށް ހިންގަމުން އަންނަ ޖަރީމާތައް ކުށްވެރިކުރުމުގައި މިހާރު ވަކި އުމުރުފުރައެއް ފަކި ފަންތިއެއް ނެތެވެ.

ބާޒާރުގައި ވިއްކަން ހުންނަ މޮޅު ފަޅޮލަށް މިހާތަނަށް އެންމެ އާއްމުކޮށް ކިޔަމުން އަންނަނީ އިޒްރާއީލް ފަޅޮލުގެ ނަމުންނެވެ. ނަމަވެސް އިޒްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންގެންދާ ނަސްލު ނައްތާލުމުގެ އަމަލުތަކުގެ ސަބަބުން ދިވެހިން މިހާރު އެ ފަޅޮލަށް އިޒްރާއީލްގެ ނަމުން ގޮވާކަށެއް ބޭނުމެއް ނޫނެވެ.

މޮޅުފަޅޯ.. ފޮޓޯ: ވޮއިސް

ބާޒާރުގައި ވިއްކަންހުންނަ ފަޅޯލުގެ ބާވަތްތަކުގެ ތެރެއިން އިޒްރާއީލްފަޅޯ ނުވަތަ މިހާރުގެ ނަމުންނަމަ ފަލަސްތީނު ފަޅޮލަކީ އެންމެ މީރު ފަޅޮލެވެ. މާލޭ ބާޒާރުގައި މޮޅު ފަޅޯ ކިލޯއެއްގެ އަގު އުޅެނީ 70 ރުފިޔާ އާއި 75 ރުފިޔާ އާ ދެމެދުގެ އަގުތަކެއްގައެވެ. އާދައިގެ ފަޅޯ ކިލޯއެއް 25 ވަރަކަށް ރުފިޔާއަށް ލިބެއެވެ.

މޮޅުފަޅޮލަކީ ރާއްޖޭގައި ދަނޑުވެރިކަންކުރާ ފަރާތްތަކުން ވަރަށް ފުޅާދާއިރާއެއްގައި ހައްދަމުން އަންނަ ބާވަތެކެވެ. މިބާވަތުގެ ފަޅޯ ބޮޑަށް ވިއްކަނީ ރިސޯޓް މާކެޓަށެވެ. މިބާވަތުގެ ފަޅޯ ކިލޯއެއްގެ އަގު މާލޭ ބާޒާރުގައި 70 ރުފިޔާއަށް ވިއްކިނަމަވެސް ހދ ހިސާބުގައި ފަލަސްތީނު ފަޅޯކިލޯއެއް 45 ރުފިޔާއަށް ލިބެއެވެ.