ޔުއެފާ ނޭޝަންސް ލީގުގައި ޑެންމާކާ ދެކޮޅަށް ކޯޕަންހޭގަންގައި ކުޅުނު މެޗަށް ޕޯޗުގަލްގެ ސްކޮޑުން ކްރިސްޓިއާނޯ ރޮނާލްޑޯ ބާކީވެ، އޭނާގެ މަޝްހޫރު 7 ނަންބަރު ޖާޒީ ރަފައެލް ލެއާއޯ އަށް ދީފިއެވެ.

ބުރާސްފަތި ދުވަހުގެ ހެނދުނު ޔުއެފާއިން އާންމުކުރި ޕޯޗުގަލްގެ 23 ކުޅުންތެރިންގެ ރަސްމީ ސްކޮޑުގައި ރޮނާލްޑޯ ހިމަނާފައެއް ނުވެއެވެ. މިއީ ޕޯޗުގަލްގެ ޓްރެއިނިންގ ކޭމްޕް ދޫކޮށް އޭނާ ދިއުމާ ގުޅިގެން ނިންމި ނިންމުމެކެވެ. އެތައް އަހަރެއް ވަންދެން ރޮނާލްޑޯގެ ނަމާ ގުޅިލާމެހި، "ސީއާރް7" ގެ ގޮތުގައި ބްރޭންޑްވެފައިވާ 7 ނަންބަރު ޖާޒީ އެހެން ކުޅުންތެރިއަކަށް ދިނުމަކީ ގިނަ ބައެއްގެ ސަމާލުކަން ހުއްޓުނު ކަމެކެވެ.

އާންމުކޮށް 17 ނަންބަރު ޖާޒީގައި ގުޅޭ ލެއާއޯ، 7 ނަންބަރު ޖާޒީގައި މި މެޗަށް ނުކުތް އިރު، އޭނާ ކުރިން ކުޅުނު 17 ނަންބަރު ޖާޒީ ދީފައިވަނީ ފަބިއޯ ސިލްވާއަށެވެ. އަދި އަނިޔާގެ ސަބަބުން ނޯވޭއާ ދެކޮޅަށް ކުޅުނު މެޗުގައި ނުކުޅެވުނު ބްރޫނޯ ފެނާންޑޭސް މިހާރު ވަނީ ޓީމާ ގުޅިފައެވެ. ނަމަވެސް އަނިޔާއިން ރަނގަޅުވަމުން އަންނަ ފްރެންސިސްކޯ ކޮންސެއިސާއޯ ސްކޮޑުގައި ނުހިމެނެއެވެ.

މި ބަދަލު ގެންނަން ޖެހުނު މައިގަނޑު ސަބަބަކީ، ޔުއެފާގެ ގަވާއިދު ބުނާގޮތުން ނޭޝަންސް ލީގުގެ މެޗުތަކަށް ހުށަހަޅާ 23 ކުޅުންތެރިންގެ ސްކޮޑުގައި 1 އިން 23 އަށް ހުރިހާ ނަންބަރެއް ހިމަނަން ޖެހޭތީއެވެ. އެހެންކަމުން ރޮނާލްޑޯ ޓީމުގައި ނެތުމުން 7 ނަންބަރު ޖާޒީ އެހެން ކުޅުންތެރިއަކަށް ދޭން މަޖުބޫރުވީއެވެ.

މެޗަށް 24 ގަޑިއިރަށް ވެފައި ވަނިކޮށް، ސެޕްޓެމްބަރު 30 ވީ ބުދަ ދުވަހު ރޮނާލްޑޯ ކޭމްޕް ދޫކޮށް ދިޔައީ، ޕޯޗުގަލްގެ ކޯޗު ޖޯޖް ޖީސަސްގެ ޕްރެސް ކޮންފަރެންސަށް ފަހު، އެ ޤައުމުގެ ފުޓްބޯޅަ ފެޑެރޭޝަންގެ ރައީސް ޕެޑްރޯ ޕްރޮއެންސާއާ ދެކެވުނު ވާހަކަތަކަކަށް ފަހުގައެވެ. އުމުރުން 41 އަހަރުގެ ފޯވާޑް ބުނެފައިވަނީ މި ނިންމުމުގެ ސަބަބު ފަހުގެ ތާރީޚެއްގައި ހާމަކުރާނެ ކަމަށެވެ. ރިޕޯޓްތައް ބުނާގޮތުގައި މި މައްސަލައިގެ ތެރެއަށް މިހާރު ޕޯޗުގަލްގެ ބޮޑުވަޒީރު ވެސް ވަނީ ޒާތީގޮތުން ވަދެވަޑައިގެންފައެވެ.

ނޯވޭއާ ދެކޮޅަށް ޕޯޗުގަލް 2-1 އިން މޮޅުވި މެޗުގައި ބެންޗުގައި އިންނަން ޖެހުމުން، އަނިޔާއެއް ނެތް ނަމަވެސް ރޮނާލްޑޯ ވަނީ ޓީމާ ވަކިން ފަރިތަކުރުންތައް ކުރިއަށް ގެންގޮސްފައެވެ. ކޯޗު ޖީސަސް ބުނީ އެ ނިންމުމާމެދު ރޮނާލްޑޯ މާޔޫސްވި ނަމަވެސް ދެމީހުންގެ ދެމެދުގައި ބޮޑު މައްސަލައެއް ނުޖެހޭ ކަމަށެވެ.

ޑެންމާކާ ދެކޮޅަށް ޕޯޗުގަލް އިއްޔެ ކުޅުނު މެޗުގައިވެސް 4-2 އިން ޕޯޗުގަލް ވަނީ މޮޅުވެފައެވެ. 

ރޮނާލްޑޯ ކޭމްޕް ދޫކޮށް ދިއުމާއެކު އޭނާގެ ބައިނަލްއަޤްވާމީ ކެރިއަރު ނިމުމަކަށް އައީ ކަމަށް ބެލެވުނު ނަމަވެސް، އޮކްޓޫބަރު 1 އާ ހަމައަށް ވެސް ޕޯޗުގަލްގެ ފުޓްބޯޅަ އިދާރާއިން އޭނާ ޤައުމީ ޓީމުން ރިޓަޔަރވިކަން ރަސްމީކޮށް އިޢުލާނެއް ނުކުރެއެވެ. 5 ފަހަރު ބެލޮންޑިއޯ ހޯދާފައިވާ ތަރި ކުރިން ހާމަކޮށްފައިވާ ގޮތުގައި އޭނާގެ ކެރިއަރުގެ އެންމެ ފަހު މަރުހަލާއަކަށް ވާނީ 2026/27 ގެ ސީޒަނެވެ.