ރައްޔިތުންނަށް ޚިދުމަތް ކުރުމުގައި އެންމެވެސް ހަމަހަމަ ވާނެ ކަމަށާ، އެކަންކަމުގައި ސިޔާސީ ތަފާތު ކުރުން ނުގެންގުޅުއްވާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އަތޮޅު ތެރެއަށް ކުރައްވަމުންދާ ދަތުރުފުޅުގެ ތެރެއިން، އއ. ތޮއްޑޫއަށް ވަޑައިގެން އެ ރަށު ރައްޔިތުންނާއެކު ބޭއްވި ބައްދަލުވުމުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، ތޮއްޑޫ ކައުންސިލުން އުފައްދާފައިވާ އެ ކައުންސިލްގެ ކުންފުނި، ”ލޯކަލް އޮތޯރިޓީ ކޮމްޕެނީ“ ފަދަ ކުންފުންޏެއް އެމަނިކުފާނު މާލޭ މޭޔަރ ކަމުގެ މަގާމުގައި ހުންނެވިއިރު، މާލޭގައިވެސް އުފެއްދެވުމަށް މަސައްކަތް ކުރެއްވި ކަމަށެވެ.
އެހެން ނަމަވެސް، އޭރު އޮތް އެމްޑީޕީ ސަރުކާރުން އެ ފުރުސަތު ދެއްވާފައި ނުވާ ކަމަށެވެ. އެ ސަރުކާރުން އެކަން ކުރީ ސިޔާސީ ވިސްނުމެއްގައި ކަމަށްވެސް އެމަނިކުފާނު ވިދާޅުވުއެވެ.
އަޅުގަނޑު އެ ގޮތަށް ކަމެއް ނުކުރާނަން. ކައުންސިލްގެ އެ ކުންފުނިން ރަށުގެ ރައްޔިތުންގެ ފުދުންތެރިކަމަށް ހިންގަވަން ބޭނުންވާ މަޝްރޫޢުތަކަށް ފުރިހަމަ އެއްބާރުލުން ސަރުކާރުގެ ތެރެއިން، އެއީ އިންވެސްޓްމަންޓް، ހަމަޖައްސައިދިނުން ކަމުގައި ވިޔަސް، އަދި އެހެނިހެން ކަންކަން މަގުފަހި ކޮށްދިނުން ކަމުގައިވިޔަސް، އެ ކުންފުންޏަށް އެއްބާރުލުން ދޭނަން
ރައީސް ޑރ. މުޙައްމަދު މުޢިއްޒު
އޭގެ ނަތީޖާއެއްގެ ގޮތުން ކައުންސިލުން ކުރަން ރާވާފައިވާ މަސައްކަތްތަކަށް، އެ ކުންފުންޏަށް އިންވެސްޓަރުން ލިބިގެންދާނެ ކަމަށް ރައީސް ވިދާޅުވިއެވެ.
ރައީސް މުޢިއްޒު ތޮއްޑޫ ރައްޔިތުންނާ ބައްދަލު ކުރެއްވުން: ފޮޓޯ/ ވޮއިސް
ސިޔާސީ ވިސްނުމެއް ނުގެން ގުޅޭނަން. ތަފާތުވެސް ނުކޮށް، މިއަދާއި ހަމައަށްވެސް މިއައީ. ބޭނުންވަނީ، އެއްވެސް ވަރެއްގެ ސިޔާސީ ވިސްނުމެއް ނުގެން ގުޅެން. މިއަދާ ހަމައަށްވެސް އައިއިރު ރައްޔިތުންނަށް ޚިދުމަތްކުރުމުގައި އަޅުގަނޑަށް ހުރިހާ ރައްޔިތުންވެސް ހަމަހަމަ. ކައުންސިލުން އަދި އތމ ކޮމިޓީގެ ކަންކަމުގައިވެސް ފުރިހަމަ އެއްބާރުލުން ދޭނަން.
ރައީސް ޑރ. މުޙައްމަދު މުޢިއްޒު
މީގެ އިތުރުންވެސް ރައީސް މުޢިއްޒު ވަނީ، ތޮއްޑޫ ރައްޔިތުން ބޭނުންވާ ކަންކަން އެ ބޭނުންވާ ގޮތަށް މަޝްވަރާއާއިއެކު ކުރިއަށް ގެންދަވާނެ ކަމުގެ ޔަގީންކަން ދެއްވާފައެވެ.
Advertisement
This content is created and paid for by advertisers and does not involve Voice Journalists
