ސީރިޔާގެ ރައީސް، ބަޝާރުލް އަސަދު ޤައުމު ދޫކޮށް ދާން ޖެހުމަކީ ހިތާމަކުރައްވާ ކަމެއް ކަމަަށް ކުރީގެ ރައީސް، މައުމޫން އަބްދުލް ޤައްޔޫމް ވިދާޅުވެއްޖެއެވެ.
ސީރިއާގެ ރައީސް ބަޝާރުލްއަސަދުގެ 24 އަހަރުގެ ވެރިކަން ނިމުނުކަން ޔަގީން ވުމާއެކު، އޭނާ ގައުމުން ފިލާފައިވާއިރު، އެކަމާއި ގުޅިގެން މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ، އެމަނިކުފާނު އެދިލައްވަނީ ސީރިޔާގެ އުޚުއްވަތްތެރި ރައްޔިތުންނަށް ސުލްޙަމަސަލަސްކަމާއި އުފާފާގަތިކަން ކަމަށެވެ.
”ރަޙްމަތްތެރި ސީރިޔާގެ ރައީސް ބައްޝާރުލްއަސަދު ޤައުމު ދޫކުރައްވައި ވަޑައިގަތުމަށްޖެހިވަޑައިގަތްކަމަށްޓަކައި ހިތާމަކުރަން. އަޅުގަނޑު އެދެނީ އެކުވެރި ސީރިޔާގެ އުޚުއްވަތްތެރި ރައްޔިތުންނަށް ސުލްޙަމަސަލަސްކަމާއި އުފާފާގަތިކަން.“
ސީރިއާގެ ރައީސް އަސަދުގެ ވެރިކަން ވެއްޓިފައިވާ ކަމަށް އެ ގައުމުގެ ސިފައިންގެ ވެރިން، އޮފިސަރުންނަށް އަންގާފައިވާ ކަމަށް މިއަދު ރޮއިޓާސް އިން ބުނެފައިވެއެވެ. މި ކުއްލި ބަދަލު އައިސްފައިވަނީ އިދިކޮޅުގެ ހަލުވި ހަމަލާތަކެއްގެ ސަބަބުންނެވެ.
އިދިކޮޅުގެ ބާރުގެ ދަށަށް ދިމިޝްޤު ގެނައުމާއެކު، އެމީހުންވެސް މިހާރު އަންނަނީ އައްސަދުގެ ކިބައިން ދިމިޝްޤު މިހާރު މިނިވަންވެފައިވާކަމަށް ބުނެ އުފާ ފާޅުކުރަމުންނެވެ. އަދި އިދިކޮޅުން އަންނަނީ ދައުލަތުގެ މީޑިއާ މެދުވެރިކޮށް ސީރިއާގެ ރައްޔިތުންނާ މުޚާޠަބުކޮށް ފުރަތަމަ ބަޔާން ދޭން ތައްޔާރުވަމުންދާ ކަމަށްވެސް އިދިކޮޅުން ބުނެފައިވެއެވެ.
އަސަދުގެ ވެރިކަން ވެއްޓިފައިވާއިރު، އޭނާ، މިއަދު އިރާކޮޅުގެ ވަގުތެއްގައި ދިމިޝްޤުން ފުރައިގެން ގޮސްފައިވާ ކަމަށް އެގައުމުގެ ސިފައިންގެ ދެ އިސް އޮފިސަރުންނާ ހަވާލާދީ ރޮއިޓާސް އިން ބުނެފައިވެއެވެ. ނަމަވެސް އޭނާ ފިލަން ދިޔަ ތަނެއް ސާފެއް ނުވެއެވެ.
ފްލައިޓްރާޑާ ވެބްސައިޓުން ދައްކާ ގޮތުގައި، ވެރިރަށް އިދިކޮޅުގެ ބާރުގެ ދަށަށް ދިޔަކަމަށް ރިޕޯޓުކުރެވުނު ވަގުތާ ދިމާކޮށް، ސީރިއާ އެއަރގެ މަތިންދާބޯޓެއް ދިމިޝްޤު އެއަރޕޯޓުން ފުރައިގެން ގޮސްފައިވެއެވެ. އެ މަތިންދާބޯޓު ފުރަތަމަ ދަތުރުކުރީ ސީރިއާގެ ކޯސްޓަލް ސަރަޙައްދަކަށެވެ. މިއީ އައްސަދުގެ އަލަވީ މަޛްހަބުގެ މީހުންގެ ނުފޫޒު ބޮޑު ސަރަޙައްދެކެވެ.
ނަމަވެސް، ކުއްލިއަކަށް މަތިންދާބޯޓު ޔޫ-ޓާނެއް ޖަހައި، އެއާ އިދިކޮޅަށް މިސްރާބު ބަދަލު ކުރިއިރު، މިނެޓުތަކެއްވަންދެން ދަތުރުކުރުމަށްފަހު މަތިންދާބޯޓް ވަނީ ޗާޓުން ގެއްލިފައެވެ. މި މަތިންދާބޯޓުގައި ތިބީ ކޮން ބައެއްކަން ޔަގީނެއް ނުވެއެވެ.
ސީރިއާގެ ރައްޔިތުން އުފާފާޅުކުރަމުންދާއިރު، ސީރިއާގެ ބޮޑުވަޒީރު މުޙައްމަދު ޣާޒީ އަލް-ޖަލާލީ ވަނީ ވެރިކަމުގެ އިންތިޤާލީ މަރުޙަލާ ކުރިއަށް ގެންދިއުމަށް ތައްޔާރަށް ހުރި ކަމަށާއި، ސީރިއާގެ ރައްޔިތުން އިޚްތިޔާރުކުރާ ކޮންމެ ވެރިކަމަކާއެކު މަސައްކަތްކުރުމަށް ތައްޔާރަށް ހުރި ކަމަށް ބުނެފައެވެ.
Advertisement
This content is created and paid for by advertisers and does not involve Voice Journalists
