ހިޔާ ޓަވަރު އެޕާޓްމަންޓަކުން މިއަދު ހަވީރު ރައްޔިތުން ބިރުގަންނަވަރަށް ދުންއަރައިފިއެވެ.

މިކަމާ ގުޅޭގޮތުން ހިޔާ ޓަވަރު 10 ގައި ދިރިއުޅެމުންދާ މީހަކު ބުނީ މިކަމެއް ހިނގާފައިވަނީ 17:22 އެހާއިރު ކަމަށެވެ. އިމާރާތުން ދުންތައް ބޭރުވެ މުޅި އެ ހިސާބަށް ފެތުރުނު ނަމަވެސް އަލިފާން ރޯވެފައެއް ނުވެއެވެ. މިކަމާ ގުޅިގެން ވޮއިސްއާ މައުލޫމާތު ހިއްސާކުރަމުން އެމްއެންޑިއެފްގެ އިންފޮމޭޝަން އޮފިސަރު ވިދާޅުވީ މިއަދު ހަވީރުގެ ވަގުތެއްގައި ހިޔާ ޓަވަރު 10 ގެ އެޕާޓްމަންޓަކުން ދުންއަރާކަމުގެ ރިޕޯޓެއް ލިބި އެކަމަށް އިޖާބަދީފައިވާކަމަށެވެ. އޮފިޝަލް ވިދާޅުވީ އެހާބޮޑަށް ދުން އެރީ ކައްކަން އުދާފައިހުރި އެއްޗަކުން ކަމަށާއި، ނުރައްކާތެރި ހާދިސާއެއް ހިނގުމުގެ ކުރިން އުނދުން ނިއްވާލާފައިވާކަމަށެވެ.

ވޮއިސްއަށް ލިބިފައިވާ ވީޑިއޯ އަދި ފޮޓޯތަކަށް ބަލާލުމުން އެ ފަންގިފިލާއިން ވަރަށްބޮޑަށް ދުން އަރާތީ ފެނެއެވެ. މިކަމާ ގުޅިގެން މަންޒަރުދުށް ފަރާތަކުން ވޮއިސް އާ ވާހަކަދައްކަމުން ބުނީ، އާދަޔާހިލާފަށް ދުންއެރިކަމަށާއި، މީގެ އެންމެ ހައިރާންވި އެއްކަމަކީ، އެހާބޮޑަށް ދުންއެރި އިރުވެސް ފަޔާ އެލާމް އަޅާފައިނުވާތީކަމަށެވެ. 

މިއަދު ހިޔާ 10 ވަނަ ޓަވަރުގެ އެޕާޓްމަންޓަކުން ދުންއަރަނީ.. ފޮޓޯ: ކިއުންތެރިއެއް

މީގެ ކުރިންވެސް ހިޔާ ޓަވަރުގައި މިފަދަ ހާދިސާތައް ހިނގާފައި އެބަހުއްޓެވެ. މިއަހަރުގެ ޖުލައިމަހުގެ 3 ވަނަ ދުވަހުވެސް މިފަދަ ހާދިސާއެއް ޓަވަރު 15 ގެ 10 ވަނަ ފަންގިފިލާގެ އެޕާޓްމަންޓެއްގައި ވަނީ ހިނގާފައެވެ. އެފަހަރުގެ އެ ހާދިސާ ހިނގަން ދިމާވީ، ގަރުދިޔަތެލި ކައްކަން އުދާފައި ގޭމީހުން ބޭރަށް ދިއުމުންނެވެ. އެފަހަރު އެމްއެންޑިއެފްގެ ފަޔަރ ޓީމުން އައިސް އެ އެޕާޓްމަންޓް ދޮރު ވައްޓާލައިގެން ވަންނަން ތައްޔާރުވެސް ވިއެވެ. ނަމަވެސް ދޮރު ހަލާކުކޮށްލަން ތައްޔަރުވިތަނުން އެގޭ މީހުން އައިސް ދޮރު ހުޅުވައި އެންމެފަހުން އުނދުން ނިއްވާލީއެވެ.

ހިޔާ ޓަވަރު 15 ގެ އެޕާޓްމަންޓަކުން ދުންއެރިދުވަހު އައި އެމްއެންޑިއެފް ފަޔަރޓީމުގެ ވެހިކަލް... ފޮޓޯ/ވޮއިސް

މިއަހަރުގެ އޭޕްރިލްމަހުގެ 22 ވަނަ ދުވަހު ހިޔާ ޓަވަރު 11 ގެ އެޕާޓްމަންޓެއްގައި ހިނގި ނުރައްކާތެރި އަލިފާނުގެ ހާދިސާއެއްގައި އެ އެޕާޓްމަންޓްގެ އެއް ކޮޓަރި ވަނީ ބޭނުން ނުކުރެވޭވަރަށް އަނދާފައެވެ.

އެ ހާދިސާގައި ޑިޒާސްޓާއިން ވަނީ އެ އެޕާޓްމަންޓުގައި އުޅުނު 7 މީހަކަށް ވަގުތީ ގޮތުން ބޯހިޔާވަހިކަންވެސް ފޯރުކޮށްދީފައެވެ. ހިޔާ ޓަވަރުތަކަކީ ބޯހިޔާވަހިކަން ފޯރުކޮށްދިނުމަށް ރާއްޖޭގައި އެންމެ އުސްކޮށް ހަދާފައިވާ އިމާރާތްތަކެވެ. ހިޔާގެ އެޕާޓްމަންޓްތަކުގައި އަލިފާނުގެ ހާދިސާތައް ދޭތެރެއަކުން ހިނގަމުން އަންނަކަން ފާހަގަކޮށްލެވެއެވެ.