އެންޓި ކޮރަޕްޝަން ކޮމިޝަން (އޭސީސީ) ގެ މެމްބަރުކަމަށް ކުރިމަތިލުމުގެ ފުރުސަތު ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައިފިއެވެ.
މިކަމާގުޅޭގޮތުން ރައީސް އޮފީހުން ކޮށްފައިވާ އިއުލާނުގައި ބުނެފައިވަނީ، އޭސީސީގެ ދެ މެމްބަރަކު މަގާމުން އިސްތިއުފާދިނުމާ ގުޅިގެން ކުރިމަތިލުމުގެ ފުރުސަތު ހުޅުވާލާފައިވާކަމަށެވެ. މެމްބަރުކަމަށް ކުރިމަތިލުމުގެ ފުރުޞަތު، މިއަދުން ފެށިގެން 16 ޑިސެންބަރު 2024 ވާ ހޯމަ ދުވަހުގެ 12:00 ގެ ނިޔަލަށް ހުޅުވާލާފައިވާކަމަށް ރައީސް އޮފީހުން ބުނެއެވެ.
އޭސީސީގެ މެމްބަރުންގެ ތެރެއިން އެންމެފަހުން އިސްތިއުފާދެއްވާފައިވަނީ، ސަލާމާއި ތޯހާ އެވެ. އެ ދެ މެމްބަރުން އިސްތިއުފާދެއްވާފައިވަނީ ރައްޔިތުންގެ މަޖިލީހުގެ ތެރެއިން ދެ ދެ މެމްބަރުން މަގާމުން ވަކިކުރުމުގެ މަސަައްކަތް ކުރިއަށްގެންދިއުމަށް މަސައްކަތްކުރަނިކޮށެވެ. އެގޮތުން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ވަނީ ތޯހާ އާއި ސަލާމް މަގާމުން ވަކިކުރުމަށް ފާސްކޮށްފައެވެ.
ރައްޔިތުންގެ މަޖިލީހުން އެ ދެ ބޭފުޅުން މަގާމުން ވަކިކުރުމުގެ މަސައްކަތް ފަށާފައިވަނީ މަގާމުގެ ނުހައްގު ބާރުތައް ބޭނުންކޮށްގެން ކޮރަޕްޝަނަށް މަގުފަހިވާގޮތަށް ބައެއް ކަންކަން ކުރުމުގެ ތުހުމަތުގައެވެ.
Advertisement
This content is created and paid for by advertisers and does not involve Voice Journalists
