ގާނޫނު އަސާސީއަށްވުރެ އިސްލާހުކުރުން މާ އައުލާކަންބޮޑު އެހެން ކަންކަން އެބަހުރިކަމަށް ނިމިގެންދިޔަ އެމްޑީޕީ ސަރުކާރުގެ ނައިބުރައީސް ފައިސަލް ނަސީމް ވިދާޅުވެއްޖެއެވެ.

އެމްޑީޕީން ވިލިމާލޭގައި މިރޭ ބޭއްވި ޖަލްސާގައި ވާހަކަދައްކަވަމުން ފައިސަލް ނަސީމް ވިދާޅުވީ، އަވަސް އަރުވާލައިގެން ގާނޫނު އަސާސީ އިސްލާހުކުރުމަށްވުރެ، ރައްޔިތުންނަށް މުހިއްމުވާ ވަރަށް މުހިއްމު ކަންކަން އެބަހުރިކަމަށެވެ. އަދުގެ ސަރުކާރުން ލައިނުގަނެގެން ޤާނޫނު އަސާސީއަށް ގެންނަމުންދާ ބަދަލުތަކަށް ވަރަށްބޮޑަށް ފާޑުވިދާޅުވެ، ވާހަކަދައްކަވަމުން ކުރީގެ ނައިބުރައީސް ވިދާޅުވީ، މިހާރު އަމަލުކުރަމުންދާ ފެހި ގާނޫނު އަސާސީއަކީ ރައްޔިތުން ވަރަށްބޮޑު ގުރުބާނީއެއްވެގެން ވުޖޫދަށް ގެނައި އެއްޗެއްކަމަށެވެ.

ފެހި ގާނޫނު އަސާސީ ވުޖޫދަށް ގެނައުމަށް ކުރި ދަތުރުގައި އެއްބަޔަކު ހުރަގޭގައި ތިބެންޖެހުނުކަން ފާހަގަކުރައްވަމުން ނައިބުރައީސް ވަނީ ބުރަ މަސައްކަތްތަކަކާއި އެތައް ވަގުތެއް ހޭދަކޮށްގެން ރައްޔިތުންގެ ލާބައަށް އެކުލަވާލި ގާނޫނު އަސާސީ ބަދަލުކުރުމަށް ސަރުކާރުން ފަށާފައިވާ މަސައްކަތް ޑިމޮކްރަޓިކް ހަމަތަކާއި އުސޫލްތަކާ މުޅިން ހިލާފްކަން ފާހަގަކުރައްވާފައެވެ. 

ކުރީގެ ނައިބުރައީސް ވިދާޅުވީ، ގާނޫނު އަސާސީ އިސްލާހުކުރުމަށްވުރެ އާސަންދަ އާއި ބޭސްފަރުވާގެ ނިޒާމް އިސްލާހުކުރުމުގެ މަސައްކަތް އަވަސްކުރުން ރައްޔިތުންނަށް މާބޮޑަށްވެސް މުހިއްމުކަމަށް ވިދާޅުވެފައެވެ. މިގޮތުން އާސަންދަ މެދުވެރިކޮށް ރައްޔިތުން އެދޭގޮތަށް ބޭރުން ބޭސްފަރުވާގެ ކަންކަން ކުރެވޭނޭ އިންތިޒާމުތައް ފަހިވެގެންދިއުމަކީ، ގާނޫނު އަސާސީއާ ކުޅުމަށްވުރެ ރައްޔިތުންނަށް މާ މުހިއްމު ކަމެއްކަމަށް ނައިބުރައީސް ފާހަގަކުރެއްވިއެވެ.

ރައްޔިތުންގެ މަޖިލީހެއް އޮތުމުގެ ރޫހުވެސް މިހާރު ގެއްލިއްޖެކަމަށާއި، މިއަދު މި ފެނިގެންދަނީ ރައްޔިތުންގެ ބާރު ނިގުޅައިގަނެވިގެންދާ މަންޒަރުކަމަށްވެސް އެމަނިކުފާނު ވިދާޅުވިއެވެ.