ބޭންކް އޮފް މޯލްޑިވްސް (ބީ.އެމް.އެލް)ގައި އެކައުންޓް ހުޅުވާފައިވާ މަސްދޯނިތަކަށް، މާދަމާ (ޑިސެމްބަރ 10، 2024) އިން ފަށައިގެން، މަސް ކިރުވާތާ 48 ގަޑިއިރުގެ ތެރޭގައި ފައިސާ ޖަމާވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިޢުލާން ކުރައްވައިފިއެވެ.

ރައީސުލްޖުމްހޫރިއްޔާ މިކަން އިޢުލާން ކުރެއްވީ އަރި އަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ކ.ގާފަރަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވާ، މިއަދު ހެނދުނު ވާހަކަފުޅުދައްކަވަމުންނެވެ.

ރައީސް މުޢިއްޒު ވިދާޅުވީ، އިއްޔެގެ ވަގުލުތެއްގައި، ލފިނޭންސް މިނިސްޓްރީއާއި ބީއެމްއެލްގެ އިތުރުން މިފްކޯއާ ދެމެދު، ހެދުނު އެއްބަސްވުމެއްގެ ދަށުން، ބީއެމްއެލް އެކައުންޓް ހުންނަ ފަރާތްތަކަށް، މާދަމާއިން ފެށިގެން، މަސްކިރާތާ 48 ގަޑިއިރުތެރޭގައި މަހަށްވާ ފައިސާ ޖަމާވެގެންދާނެ ކަމަށެވެ.

މިއާއެކު، މަސްވެރިންނަށް ފައިސާ ދިނުމުގެ ކަންކަމުގައި ވެދިން އެހީތެރިކަން ފާހަގަކުރައްވައި، ރައީސް ވިދާޅުވީ، ބީއެމްއެލްއިން އަންނަނީ ހަގީގަތުގައިވެސް އެއީ ރައްޔިތުންގެ ބޭންކެއްކަން ސާބިތުކޮށްދެމުން ކަމަށެވެ. 

މަސް ކިރުވާތާ 48 ގަޑިއިރުގެ ތެރޭގައި ފައިސާ ދިނުމަކީ ރައީސް މުޢިއްޒުގެ ރިޔާސީ ވަޢުދުފުޅެކެވެ. ނަމަވެސް، އެކަން މީގެ ކުރިން ވެފައި ނުވަނީ، މި ސަރުކާރާ ހަވާލުވިއިރު މަސްވެރިންނަށް ނުދީ އެތައް މިލިއަން ފައިސާއެއް ހުރުމުން ކަމަށް މީގެ ކުރިން ސަރުކާރުން ވަނީ ބުނެފައެވެ.