މާދަމާއިން ފެށިގެން، އެސްޓީއޯ ރޭޓްގައި ރާއްޖޭގެ 4 ސަރަހައްދަކުން ތެޔޮ ލިބޭނެ ކަން ރައީސް ޑރ. މުޙައްމަދު މުޢިއްޒު އިއުލާން ކުރައްވައިފިއެވެ. 

ރައީސުލްޖުމްހޫރިއްޔާ މިކަން އިޢުލާން ކުރެއްވީ އަރި އަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ކ.ގާފަރަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވާ، މިއަދު ހެނދުނު ވާހަކަފުޅުދައްކަވަމުންނެވެ.

އެގޮތުން، އެމަނިކުފާނު ވިދާޅުވީ، މަސްވެރިންނަށް ހެޔޮ އަގުގައި، އެސްޓީއޯ ރޭޓްގައި ފޯރުކޮށްދިނުމަށް، ކޮންމެ އަތޮޅަކުންވެސް އެއް ރަށެއްގައި އެ ޚިދުމަތް ދިނުމަކީ އެމަނިކުފާނުގެ ވައުދުފުޅެއް ކަމަށެވެ.

Advertisement

އެހެން ނަމަވެސް، މާދަމާއިން ފެށިގެން، އެސްޓީއޯގެ، ފިޔުލް ސަޕްލައި މޯލްޑިވްސް (އެފްއެސްއެމް)ގެ ހަތަރު ސައިޓުން އެސްޓީއޯގެ ރޭޓްގައި ތެޔޮ ލިބޭނެ ކަމަށް ރައީސް ވިދާޅުވިއެވެ. 

އެ ހަތަރު ސައިޓަކީ؛ 

1) ހިންމަފުށި

2) ކޫއްޑު

3) ފެލިވަރު

4) އައްޑޫ ސިޓީ ހުޅުމީދޫ

މީގެ އިތުރުން ކޫއްޑޫއާއި ފެލުވަރުގައި ހުރި، މިފްކޯގެ އުޅަނދުތަކުންވެސް އެސްޓީއޯ ރޭޓްގައި ތެޔޮ ވިއްކުމުގެ އިންތިޒާމް ހަމަޖައްސަން މަސައްކަތް ކުރަމުންދާ ކަމަށާ، އެކަން ހަމަޖެހުމުން ކޫއްޑޫ އާއި ފެލިވަރުގައި ހުރި މިފްކޯގެ އުޅަނދުތަކުން އެސްޓީއޯ ރޭޓް ގައި ތެޔޮ ލިބޭނެ ކަމަށް ރައީސް މުޢިއްޒު ވިދާޅުވިއެވެ.