އެމްޑީޕީގެ އެކްޓިވިސްޓަކު ދެއްކި ވާހަކައަކަށް، ކުރީގެ ރައީސް މުހައްމަދު އަމީން ދީދީ އާ ގުޅުވައިގެން މިއަދު އެމްޑީޕީގެ ޗެއާޕާސަން ފައްޔާޒް އިސްމާއީލް ދެއްކެވި ވާހަކަތަކަކީ އާދައިގެ ވާހަކައެއްކަމަށް ބަލައިގެން ނުވާނޭކަމަށް ރައްޔިތުން މަޖިލީހުގެ ރައީސް އަދި ޕީއެންސީގެ ޗެއާޕާސަން ޢަބްދުއްރަހީމް ޢަބްދުﷲ ވިދާޅުވެއްޖެއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ފައްޔާޒް ވަނީ އަދުގެ ރައީސުލްޖުމްހޫރިއްޔާ ރައްޔިތުންނަށް ދެރަދޭ އުސޫލުން ކަންކުރާނަމަ، ކުރީގެ ރައީސް މުހައްމަދު އަމީން އަށް ހެދިގޮތް ނޫން އިތުރުގޮތެއް ނެތްކަމަށް ވިދާޅުވެފައެވެ. 

މިކަމާ ގުޅޭގޮތުން ޢަބްދުއްރަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، އެއީ ކަނޑައެޅިގެން ޓެރަރިޒަމަށް ހިތްވަރުދިނުންކަމަށެވެ. ޢަބްދުއްރަހީމް ވިދާޅުވީ މިއީ ކަމާގުޅޭ މުއައްސަސާތަކުން ވަރަށް ސީރިއަސްކަމާއެކު ވަގުތުން ބަލަންޖެހޭކަމެއްކަމަށެވެ.

އެމްޑީޕީން މިއަދު ނޫސްވެރިންގެ ބައްދަލުވުން ބާއްވާފައިވަނީ އެޕާޓީން މާދަމާ ރޭ ބޭއްވުމަށް ހަމަޖެހިފައިވާ ބޮޑު ޖަލްސާއަށް ތައްޔާރުވުމާ ގުޅޭގޮތުން މައުލޫމާތު ދިނުމަށެވެ. ނޫސްވެރިންނާ ވާހަކަދައްކަވަމުން ފައްޔާޒް ވަނީ ކުރީގެ ރައީސް އަމީން އާ ގުޅޭގޮތުން އެމްޑީޕީގެ އެކްޓިވިސްޓަކު ދެއްކި ވާހަކަ ދިފާއުކޮށް ވާހަކަދައްކަވާފައެވެ. އެގޮތުން ރައްޔިތުންނަށް ދެރަދޭ އުސޫލުން ކަންކުރާނަމަ އަމީން ދީދީއަށް ހަދާލިގޮތުން ނޫން ދެން އިތުރުގޮތެއް ނެތްކަމަށް ވިދާޅުވެފައެވެ. ފައްޔާޒު ވިދާޅުވީ އެހެން ބުނި މީހަކު އެގޮތަށް ބުނެފައިވަނީ ރައީސް ޑރ.މުއިއްޒުއަށް ނަސޭހަތަކަށް ކަމަށެވެ.

ކުރީގެ ރައީސް އަމީން އާ ގުލޭގޮތުން ފައްޔާޒު މިއަދު ދެއްކެވި ވާހަކަތަކާ ގުޅޭގޮތުން އާއްމުންގެ އިތުރުން ސިޔާސީ ބައެއް ފަރާތްތަކުންވެސް ދަނީ ކަންބޮޑުވުން ފާޅުކުރަމުންނެވެ. މިގޮތުން ކުރީގެ ރައީސް އަމީން ދީދީގެ އާއިލާއިންވެސް ވަނީ ފައްޔާޒުގެ ވާހަކަތަކަށް ރައްދުދީފައެވެ. 

ފައްޔާޡުގެ އެވާހަކަތަކާ ގުޅިގެން އަމީން ދީދީގެ ކާފަ ދަރިކަނބަލުން، ޑރ.ފަރަހަނާޒް ފައިސަލް އެކްސްގައި ކުރެއްވި ޕޯސްޓެއްގައި ވިދާޅުވީ، އިސްލާމީ ޝަރުޢީ ހަމަތަކުން ބޭރުން މީހަކު މަރާލުމަކީ ދުވަހަކުވެސް ގަބޫލްކުރެވޭނެ ކަމެއް ނޫންކަމަށެވެ. ކޮންމެ ގޮތަކަށް ކަމެއް ކުރިޔަސް ބަޔަކުނިކުމެ މީހަކު މަރާލުމަކީ އަޅުގަނޑުމެންގެ ދީން އިސްލާމްދީން ހުއްދަކުރާ ކަމެއް ނޫންކަމަށްވެސް ފަރަހަނާޒް ވަނީ ވިދާޅުވެފައެވެ.