އިދިކޮޅު މައިޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމުގައި ހުންނެވި، ކުރީގެ އިކޮނަމިކް މިނިސްޓަރ ފައްޔާޒު އިސްމާޢީލް ޓެރަރިޒަމަށް ހިތްވަރުދީ، ލޭއޮހޮރުވަން ގޮވާލި މައްސަލަ ބެލުމަކީ ލާޒިމު ކަމެއް ކަމަށް، އިގްތިޞާދީ ތަރައްގީއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމުގައި ފައްޔާޒް ވަނީ އަދުގެ ރައީސުލްޖުމްހޫރިއްޔާ ރައްޔިތުންނަށް ދެރަދޭ އުސޫލުން ކަންކުރާނަމަ، ކުރީގެ ރައީސް މުހައްމަދު އަމީން އަށް ހެދިގޮތް ހަދަންޖެހޭ ކަމަށް ވިދާޅުވެފައެވެ.

ފައްޔާޒުގެ މި ވާހަކަ އާއި ގުޅިގެން ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، ކުރީގެ އިކޮނަމިކް މިނިސްޓަރ ފައްޔާޒު އިސްމާޢީލް ޓެރަރިޒަމަށް ހިތްވަރުދީ، ލޭއޮހޮރުވަން ގޮވާލުމުގެ ފިނޑި ޢަމަލު މިފަހަރު ހިންގެވީ އެމްޑީޕީ ޗެއާޕާސަން ކަމަށެވެ.

އެމްޑީޕީން އިއްޔެ ނޫސްވެރިންގެ ބައްދަލުވުން ބާއްވާފައިވަނީ އެޕާޓީން މިރޭ ބޭއްވުމަށް ހަމަޖެހިފައިވާ ބޮޑު ޖަލްސާއަށް ތައްޔާރުވުމާ ގުޅޭގޮތުން މައުލޫމާތު ދިނުމަށެވެ.

ނޫސްވެރިންނާ ވާހަކަދައްކަވަމުން ފައްޔާޒް ވަނީ ކުރީގެ ރައީސް އަމީން އާ ގުޅޭގޮތުން އެމްޑީޕީގެ އެކްޓިވިސްޓަކު ދެއްކި ވާހަކަ ދިފާއުކޮށް ވާހަކަދައްކަވާފައެވެ. އެގޮތުން ރައްޔިތުންނަށް ދެރަދޭ އުސޫލުން ކަންކުރާނަމަ އަމީން ދީދީއަށް ހަދާލިގޮތުން ނޫން ދެން އިތުރުގޮތެއް ނެތްކަމަށް ވިދާޅުވެފައެވެ. ފައްޔާޒު ވިދާޅުވީ އެހެން ބުނި މީހަކު އެގޮތަށް ބުނެފައިވަނީ ރައީސް ޑރ.މުއިއްޒުއަށް ނަސޭހަތަކަށް ކަމަށެވެ.

ކުރީގެ ރައީސް އަމީން އާ ގުލޭގޮތުން ފައްޔާޒު މިއަދު ދެއްކެވި ވާހަކަތަކާ ގުޅޭގޮތުން އާއްމުންގެ އިތުރުން ސިޔާސީ ބައެއް ފަރާތްތަކުންވެސް ދަނީ ކަންބޮޑުވުން ފާޅުކުރަމުންނެވެ. މިގޮތުން ކުރީގެ ރައީސް އަމީން ދީދީގެ އާއިލާއިންވެސް ވަނީ ފައްޔާޒުގެ ވާހަކަތަކަށް ރައްދުދީފައެވެ.