މާލޭގައި ހުންނަ އޮފީހަކަށް ވަދެ ލެޕްޓޮޕާއި އައިފޯން ވަގަށް ނެގި މީހަކު ފުލުހުން ވަނީ ހައްޔަރުކޮށްފައެވެ.

މި މައްސަލައާ ގުޅިގެން ހައްޔަރުކޮށްފައިވަނީ ރ. އަލިފުށީ / ހަބީބީހަޕް، އިސްމާޢީލް ސާއިފް (39 އަހަރު) އެވެ.

ފުލުހުން ބުނާ ގޮތުގައި ހ. ފިލިމާގޭ ގްރައުންޑް ފްލޯގައި ހުންނަ އޮފީހަކުން ވައްކަން ކޮށްފައިވާ މައްސަލަ ރިޕޯޓްކޮށްފައިވަނީ ޑިސެމްބަރު 9 ވަނަ ދުވަހުގެ ހެނދުނުގެ ވަގުތެއްގައެވެ. މި މައްސަލައާ ގުޅިގެން އިސްމާޢީލް ސާއިފް ހައްޔަރުކޮށްފައިވަނީ އިއްޔެއެވެ.

Advertisement

ފުލުހުން މަޢުލޫމާތު ދީފައިވާ ގޮތުގައި އިސްމާޢީލް ސާއިފް އެ އޮފީހުން ވަގަށް ނެގިކަމަށް ބެލެވޭ ދެ ލެޕްޓޮޕާއި، ދެ އައިފޯނާއި، އިއަރޕޮޑްސްއާއި އަތުކުރީ ގަޑި ހޯދައި ވެރިފަރާތާ ވަނީ ހަވާލުކޮށްފައެވެ.

މި މައްސަލައާ ގުޅިގެން އިސްމާޢީލް ސާއިފްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ފުލުހުން ބުނާ ގޮތުގައި މި މައްސަލަ ފުލުހުން ގެންދަނީ ތަޙުޤީޤުކުރަމުންނެވެ.