ރަސްފަންނު ސަރަހައްދުގައި ދެ އަންހެނެއްގެ ގައިގައި އަތްލާ ޖިންސީ ގޯނާ ކުރި ކަމުގެ ތުހުމަތުގައި ސްރީ ލަންކާއަށް ނިސްބަތްވާ މީހަކު ހައްޔަރުކޮށްފިއެވެ.
ހައްޔަރު ކުރީ، އުމުރުން 28 އަހަރުގެ ސަންޖަޔާ ކުމާރެވެ.
ފުލުހުން ބުނެފައިވާގޮތުން، ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައާ ގުޅިގެން އޭނާ ފުލުހުންގެ ބެލުމުގެ ދަށަށް ގެނެސްފައި ވަނީ މި މަހުގެ 13 ވަނަ ދުވަހު ކަމަަށެވެ.
އަދި އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ބަންދަށް ފަސް ދުވަސް ޖަހާފައިވާ ކަމަށްވެސް ފުލުހުން ވިދާޅުވިއެެވެ.
މި މީހާގެ ބަންދު އަމުރުގައިވާ ގޮތުން އޭނާ ވަނީ ތުހުމަތު ތަކަށް އިންކާރު ކޮށްފައެވެ. އެގޮތުން، އޭނާ މީހެއްގެ ގައިގައި އަތް ލާފައެއް ނުވާނެ ކަމަށާ އެހެން ނަމަވެސް ކުރިމަތިން ދިޔައިރު އަންހެން މީހާ އެނބުރިފައި ތިމަންނަގެ ގައިގަ އަތްލީކަމަށް ބުނި ކަމަށް އޭނާ ބުނި ކަމަށް ބުންޏެވެ. އަދި، ރާއްޖޭގައި އުޅޭތާ ދޮޅު އަހަރު ވެއްޖެ ކަމަށް އޭނާ ބުނެފައިވާ ކަމަށް އެ އަމުރުގައި ވެއެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
