ޗައިނާއާއި ޓައިވާނުގެ ރަސްމީ ނަމުގެ އެއްގޮތްކަމުން، ބައެއް ފަރާތްތަކަށް މިނަންތައް އޮޅޭ ގޮތް ދިމާވުމަކީ އާއްމު ކަމެކެވެ. ރައީސް ސޯލިޙްގެ ސަރުކާރުގައިވެސް ޗައިނާއަށް ސަފީރަކު އައްޔަންކުރަން މަޖިލީހަށް ފޮނުއްވި ސިޓީފުޅުގައި ރިޕަބްލިކް އޮފް ޗައިނާއަށް ސަފީރަކު ކަނޑައަޅަން ފޮނުއްވުނު މައްސަލަ ހޫނުވިއެވެ. ރިޕަބްލިކް އޮފް ޗައިނާއަކީ ޓައިވާނެވެ. ޗައިނާއަކީ ޕީޕަލްސް ރިޕަބްލިކް އޮފް ޗައިނާއެވެ.

ޗައިނާއިން ޓައިވާނުގެ މިނިވަންކަން ބަލައިނުގަންނައިރު، ވަރަށް ގިނަ ފަހަރަށް މިގޮތަށް އޮޅިގެން ރިޕަބްލިކް އޮފް ޗައިނާއަކީ ޗައިނާކަމަށް ހީކޮށް މީހުން ކިޔާތީ ޗައިނާއިން އަބަދުވެސް ނުރުހުންފާޅުކުރެއެވެ.

މިފަހަރު ދެ ގައުމުގެ ނަން އޮޅިވަޑައިގެންނެވީ ލަންކާގެ އައު ބޮޑުވަޒީރަށެވެ. ސްރީލަންކާގެ ސްކޫލް ކުދިންނަށް ބޭނުންވާ ފޮތީގެ އެހީ ޗައިނާއިން ލަންކާއަށް ދިނުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ލަންކާގެ ބޮޑުވަޒީރު ޑރ. ހަރިނި އަމަރަސޫރިޔާ ޝުކުރު އަދާކުރެއްވީ ރިޕަބްލިކް އޮފް ޗައިނާ އަށެވެ. އެވަގުތު އެރަސްމިއްޔާތުގައި ޗައިނާއިން ލަންކާއަށް ކަނޑާއަޅާފައި ހުންނަވާ ސަފީރު ކީ ޝެންގްހޮންގް ވެސް ހުންނެވިއެވެ.

ކޮލޮމްބޯ ޕޯޓްގައި އޮތް މި ރަސްމިއްޔާތު ފެށުނީވެސް ގޯސްކޮށެވެ. ރަސްމިއްޔާތު ފެށޭ ގަޑިއަށް ޗައިނާ ސަފީރު ވަޑައިގަތްނަމަވެސް، ލަންކާގެ ބޮޑުވަޒީރު ވަޑައެއް ނުގަންނަވައެވެ. އެހެންކަމުން ޗައިނާ ސަފީރު އެނބުރި އޮފީހަށް ވަޑައިގަތެވެ. ރަސްމިއްޔާތު ބޭއްވީ ގަޑިއެއްހާ އިރު ފަހުން، ބޮޑުވަޒީރު ވަޑައިގަތުމުންނެވެ.

މިދިޔަ ހޯމަ ދުވަހުވެސް މިފަދަ ޑިޕްލޮމެޓިކް ހާދިސާއެއް ހިނގިކަމަށްވެއެވެ.

އިރާގުގެ ޑިޕްލޮމެސީއަށް ގަރުނެއް ފުރުން ފާހަގަކުރުމަށް އެގައުމުން ބޭއްވި ރަސްމިއްޔާތުގެ ޝަރަފުވެރި މެހުމާނަކަށް ދައުވަތު އެރުވީ ލަންކާގެ އިންޑަސްޓްރީސް މިނިސްޓަރ ސުނިލް ހަންދުނެއްޓި އަށެވެ. މިނިސްޓަރ ހަންދުނެއްޓި މިޖަލްސާއަށް ވަޑައިނުގަންނަވާއިރު، ޖަލްސާއަށް ވަޑައިނުގަންނަވާނެކަންވެސް ފޮރިން މިނިސްޓްރީގެ ޕްރޮޓޮކޯލް ޑިވިޝަނުން އިރާޤު އެމްބަސީއަށް އަންގަވާފައެއް ނުވެއެވެ. އަދި ބަދަލުގައިވެސް އެހެން ބޭފުޅަކުވެސް ވަޑައައެއް ނުގަންނަވައެވެ. ލަންކާގެ ސައިފަތް އެންމެ ގިނައިން ގަންނަ ގައުމުކަމަށްވާ އިރާޤުގެ ފަރާތުން ބޭއްވި އެރަސްމިއްޔާތު ކުރިއަށް ދިޔައީ ލަންކާ ސަރުކާރުގެ އިސް އެއްވެސް އޮފިޝަލެއް ނެތިއެވެ. އެހެންނަމަވެސް އިދިކޮޅު ލީޑަރު ސަޖިތު ޕްރެމަދާސަ ހުންނެވިއެވެ.