ބޭންކް އޮފް މޯލްޑިވްސްއަށް ގިނަ އަދަދެއްގެ އޭޓީއެމް ހޯދުމަށް އިއުލާނުކޮށާްފިއެވެ.

ޤައުމީ ބޭންކުން މިއަދު ކޮށްފައިވާ އިއުލާނެއްގައި ބުނެފައިވަނީ، އެ ބޭންކަށް 65 އޭޓީއެމް، ސަޕްލައިކޮށްދޭނޭ ފަރާތެއް ބޭނުންވާކަމަށެވެ. އެކަމަށް ޝައުގުވެރިވާ ފަރާތްތަކުން އަންދާސީހިސާބު ހުށަހަޅަން ޖެހެނީ، މިހިނގާ ޑިސެމްބަރުމަހުގެ 24 ވާ އަންގާރަދުވަހުގެ މެންދުރު 14:00 އަން ބީއެމްއެލްގެ ހެޑް އޮފީހަށެވެ. 

ބީއެމްއެލުން ގިނަ އަދަދެއްގެ އޭޓީއެމް ހޯދަން އިއުލާނުކޮށްފައިވާއިރު، އެ ބޭންކުން ވަނީ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމުގެ ޕްރޮގްރާމެއް ފަށާފައެވެ. މިކަމާ ގުޅޭގޮތުން ބީއެމްއެލް އާއި ސަރުކާރާ ދެމެދު އެއްބަސްވުމެއްގައި ސޮއިކޮށްފައިވަނީ މިދިޔަ ނޮވެމްބަރުމަހުގެ 7 ވަނަ ދުވަހުއެވެ. މި ޕްރޮގްރާމްގެ ދަށުން އެންމެ ފުރަތަމަ އޭޓީއެމްގެ ހިދުމަތް ފަށާފައިވަނީ  އދ އޮމަދޫ ގައެވެ.

ބީއެމްއެލުން އަމާޒު ގިފާފައިވަނީ އަންނަ އަހަރު ނިމެންވާއިރަށް ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަށެވެ.  ބީއެމްއެލްގެ ސީއީއޯ ޝަރީފް ވިދާޅުވެފައިވަނީ، އޭޓީއެމް ބެހެއްޓުމުގެ ޕްރޮގްރާމް ކުރިއަށްދާނީ ދެ ފިޔަވައްސަކަށް ބަހާލައިގެން ކަމަށެވެ. ފުރަތަމަ ފިޔަވަހި އަންނަ އަހަރުގެ މާޗްމަހުގެ ކުރިން ނިންމުމަށް އަމާޒުހިފާފައިވާއިރު އެހާތަނަށް މީހުން ދިރިއުޅޭ 17 ރަށެއްގައި އޭޓީއެމް ބަހައްޓައި ނިންމާނޭކަމަށް ޝަރީފް ވިދާޅުވިއެވެ.

ބޭންކް އޮފް މޯލްޑިވްސްއިން ވަނީ މިހާތަނަށް 90 ރަށެއްގައި 150 އޭޓީއެމް ބަހައްޓާފައެވެ.