ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރުކަމުގެ މަޤާމުން މުހައްމަދު ސައީދު އިސްތިއުފާ ދެއްވައިފިއެވެ.
ޕީއެސްއެމްގެ އެމްޑީކަމުގެ މަގާމުން ސައީދު އިސްތިއުފާދެއްވާފައިވަނީ، މިއަދުގެ ވަގުތެއްގައިކަން ވޮއިސްއަށް ވަނީ، އިތުބާރުހިފޭ ފަރާތަކުން މައުލޫމާތު ދީފައެވެ. ނަމަވެސް ސީދާ އިސްތިއުފާދެއްވީ ކީއްވެގެންކަން އަދި ސާފެއް ނުވެއެވެ.
ވޮއިސް އިން ސައީދަށް ގުޅުމުން ފޯނަށް ޖަވާބުދެއްވާފައިނުވާއިރު، ކުރި މެސެޖަށްވެސް ޖަވާބު ދެއްވާފައެއް ނުވެއެވެ. މީގެ އިތުރުން ސަރުކާރު ކުންފުނިތަކުގެ ބަލަދުވެރި ފަރާތް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިންވެސް މިކަމާ ގުޅޭގޮތުން އެއްޗެކޭ ބުނެފައެއް ނުވެއެވެ.
ސައީދު މަގާމުން އިސްތިއުފާދެއްވިއިރު، އޭނާ އާލާސްކަންފުޅާ އުޅުއްވާކަމަށްވެސް ހަބަރު ލިބެއެވެ.
ޕީއެސްއެމްގެ އެމްޑީކަމުގެ މަގާމުން ސައީދު އިސްތިއުފާ ދެއްވާފައިމިވަނީ، މި ފަހަކަށް އައިސް އެތަނުގެ ކޮންޓެންޓުގެ މައްސަލަތަކެއް ފެންމަތިވެފައިވަނިކޮށެވެ. ޕީއެސްއެމްތެ ޗެނަލްތަކުން ލައިވްކޮށް ދެއްކި އިވެންޓެއްގައި ކިޔެވި ކީރިތި ގުރުއާނުގެ އާޔަތެއްގެ އެއްބައި ކަނޑައިގެން ދިޔަ މައްސަލަ ޖެހިފައިވާއިރު، ބަރަހަނާ މަންޒަރެއް ފެންނަ ކޮންޓެންޓެއް ޓީވީން ދެއްކުނު މައްސަލައެއްވެސް ވަނީ ފެންމަތިވެފައެވެ. މި ދެ މައްސަލާގައިވެސް ޕީއެސްއެމުން ވަނީ މައާފަށް އެދިފައެވެ. އަދި އެކަމުގެ އިހުމާލުވީ މުއައްޒަފުންނަށް ވަނީ ފިޔަވަޅުވެސް އަޅާފައެވެ.
ޕީއެސްއެމުގެ މެނޭޖިންގ ޑިރެކްޓަރުކަމުގެ މަޤާމަށް މުހައްމަދު ސައީދު އައްޔަނުކޮށްފައިވަނީ މިއަހަރުގެ އޮގަސްޓްމަހުގެ 24 ވަނަ ދުވަހުއެވެ.
މުހައްމަދު ސައީދަކީ މީގެ ކުރިން ދައުލަތުގެ އެކި މަގާމުތައް ފުރުއްވާފައިވާ ބޭފުޅެކެވެ. މިގޮތުން އޭނާ ވަނީ އެޑިއުކޭޝަން މިނިސްޓްރީގައި ތަފާތު އެކި މަގާމުތައް ފުރުއްވާފައެވެ. މީގެ ތެރޭގައި ޑިރެކްޓަރ ޖެނެރަލް ކަމުގެ މަގާމާއި ޕާމަނަންޓް ސެކެޓްރީކަން ހިމެނެއެވެ.
މުޙައްމަދު ސަޢީދު ވަނީ އިނގިރޭސިވިލާތުގެ ޔުނިވަރސިޓީ އޮފް ބޯލްޓަންއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ހާސިލް ކުރައްވާފައެވެ.
ޕީއެސްއެމްގެ އެމްޑީކަމުގެ މަގާމަށް ސައީދު ހަމަޖައްސަވާފައިވަނީ އޭރު، މަގާމުގައި ހުންނެވި ޒީނާ ޒާހިރު މަގާމުން އިސްތިއުފާދެއްވުމުންނެވެ.
Advertisement
This content is created and paid for by advertisers and does not involve Voice Journalists
