އުމުރާ ނުގުޅޭ ވާހަކަތަކެއް ދައްކައިގެން ދަރިވަރުން ގްރޫމްކުރި ކަމަށް ތުހުމަތުކުރާ ޓީޗަރު ދޫކޮށްލައިފި އެވެ.

މީގެ ކުރިން ފުލުހުން މައުލޫމާތު ދިން ގޮތުގައި، ރާއްޖޭގެ ދެކުނު މެދުގެ އަތޮޅެއްގެ (މ،ފ،ދ،ތ،ލ) ރަށެއްގައި ހިނގު އެ މައްސަލަ ފުލުހުންނަށް ހުށަހެޅީ މިދިޔަ 17 އޮކްޓޯބަރުގައި ކަމަށެވެ.

އަދި ކޯޓު އަމުރެއްގެ ދަށުން ޓީޗަރު ހައްޔަރުކުރީ 10 ދުވަސް ފަހުން، 27 އޮކްޓޯބަރުގައި ކަމަށާ، އެއީ 29 އަހަރުގެ ދިވެހި ފިރިހިނެއް ކަމަށްވެސް އޭރު ފުލުހުން ބުންޏެވެ. 

Advertisement

އޭނާގެ ބަންދަށް އެންމެ ކުރިން ޖެހީ 20 ދުވަހެވެ. އޭގެ ފަހުން 30 ދުވަސް ޖަހާފައިވާއިރު، މިއަދު ފުލުހުން ބުނީ، އޭނާގެ ބަންދުގެ މުއްދަތު އިތުރު ކުރުމަށް ކޯޓަށް ހާޒިރު ކުރުމުން ޝަރުތުތަކަކާ އެކު ދޫކޮށްލާފައިވާ ކަމަށެވެ.

އޭނާގެ މައްޗަށް ދައުވާކޮށްދިނުމަށް އެދި 25 ނޮވެމްބަރުގައި މައްސަލަ ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށް ވެސް ފުލުހުން ބުންޏެވެ.