ދުންފަތް ކޮންޓްރޯލް ކުރުމާބެހޭ ގާނޫނާ ޚިލާފްވެގެން މިހާތަނަށް 4 މީހަކު ޖޫރިމަނާ ކޮށްފައިވާ ކަމަށް ފުލުހުން ބުނެފިއެވެ. 

މިމަހު 15 ވަނަ ދުވަހުން ފެށިގެން ވޭޕް ވިއްކުމާއި ހިލޭ ބެހުމާއި އެ ބުއިންވެސް މަނާ ކުރާ ގޮތަށް ގާނޫނު އިސްލާޙް ކޮށްފައިވާއިރު، އެ ގާނޫނާ ޚިލާފްވެގެން، މިމަހުގެ 17 ވަނަ ދުވަހުގެ ނިޔަލަށް 4 މީހުން ޖޫރިމަނާކޮށްފައިވާ ކަމަށް ފުލުހުން ވަނީ މިއަދު ބުނެފައެވެ. 

އެގޮތުން ކުރެވުނު ޖޫރިމަނާ ފައިސާގެ ޖުމްލަ އަދަދީ 20،000ރ ކަމަށްވެސް ބުންޏެވެ. 

އަދި އެ ޖޫރިމަނާކޮށްފައިވަނީ ދުންފަތް ކޮންޓްރޯލްކުރުމާބެހޭ ގާނޫނަށް އެއްވަނަ އިސްލާހު ގެނައުމުގެ ގާނޫނާއި އެއްގޮތްވާ ގޮތުގެ މަތިން ކަމަށެވެ.

ރާއްޖޭގައި ވޭޕް ބޭނުންކޮށް އެތަކެތީގެ ވިޔަފާރިކުރުން މަނާކޮށް، ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށް ދުންފަތް ކޮންޓްރޯލް ކުރުމާއި ބެހޭ ގާނޫނަށް ހުށަހެޅި އިސްލާހުގައުވާގޮތުން، އެ ގާނޫނާ ޚިލާފް ވެއްޖެ ބޮޑު ޖޫރިމަނާއެއް ދައްކަންޖެހޭއެވެ. 

އެއީ؛ 

1. ވޭޕާއި ވޭޕް ކުރަން ބޭނުން ކުރާ ތަކެތި ރާއްޖެއަށް އެތެރެ ކޮށްފިނަމަ، އެތެރެ ކުރި މީހަކު 50،000 ރުފިޔާއިން ޖޫރިމަނާ

2- އެތެރެ ކުރާ ކޮންމެ ވޭޕަކަށް އިތުރު 10،000 ރުފިޔާގެ މަގުން ޖޫރިމަނާ

3- ރާއްޖޭގައި ވޭޕް ވިއްކާ ކޮންމެ މީހަކަށް 20،000 ރުފިޔާގެ ޖޫރިމަނާއެއް، އަދި ވިއްކި ކޮންމެ ވޭޕަކަށް 10،000 ރުފިޔާގެ މަގުން ޖޫރިމަނާ

4- ހިލޭ މީހަކަށް ވޭޕެއް ދީފިނަމަ 10،000 ރުފިޔާގެ ޖޫރިމަނާއެއް

5- ވޭޕް ބޭނުން ކުރާ މީހަކު 5،000 ރުފިޔާއިން ޖޫރިމަނާ