ބިންވެރިޔާ ސްކީމުގައި ހިމެނޭ ގޯތިތައް ދިނުމުގައި އެޗްޑީސީގެ އެއްވެސް ބައިވެރިވުމެއް ނޯންނާނޭކަމަށް އެކުންފުނީގެ މެނޭޖިންގ ޑިރެކްޓަރު ފަޒުލް ރަޝީދު ވިދާޅުވެއްޖެއެވެ.
ބިންވެރިޔާ ސްކީމުން ގޯތި ލިބެން ނުޖެހޭ ބަޔަކަށް ގޯތި ދިންކަމަށް ތުހުމަތުކުރެވޭ މައްސަލައެއްގައި ފުލުހުން މިއަދު ވަނީ އެޗްޑީސީއަށް ވަދެ ބަލާފާސްކޮށްފައެވެ. ބިންވެރިޔާ ސްކީމުގެ ދަށުން ހައްގުނުވާ ބަޔަކަށް ގޯތި ދިނުމުގައި އެޗްޑީސީގެ ބައިވެރިވުން އޮތްކަމަށް ދެކެވޭ ވާހަކަތަކާ ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފަޒުލް ވިދާޅުވީ، ގޯތި ލިބެން ނުޖެހޭ ބަޔަކަށް އެޗްޑީސީން ގޯތި ދީފައިނުވާނޭކަމަށެވެ. ވަކިން ހާއްސަ ގޮތެއްގައި އެޗްޑީސީގެ މުއައްޒަފަކު ހިއްސާވާގޮތަށް ބިންވެރިޔާ ސްކީމުން ގޯތި ލިބިފައިވާ ފަރާތެއްގެ ހައްގު ނިގުޅައިގެންފަ ނުވާނޭކަން ފަޒުލް ވިދާޅުވިއެވެ.
ފަޒުލްގެ ބޭބެއަށް އެޗްޑީސީން ގޯތި ދިންކަމަށް ދެކެވެމުންދާ ވާހަކަތަކާ ގުޅޭގޮތުން ފަޒުލް ވިދާޅުވީ، އެފަދަ ކަމެއް ކޮށްފައި ނުވާނޭކަމަށާއި، ބިންވެރިޔާ ސްކީމުން ގޯތި ދިނުމުގައި މައްސަލައެއް އުޅޭކަން ފާހަގަކުރެވިގެން އެކަން ހައުސިން މިނިސްޓްރީގެ ސަމާލުކަމަށް ގެނައީވެސް އެޗްޑީސީން ކަމަށެވެ. ފަޒުލް ވިދާޅުވީ، މި މައްސަލާގައި ފުލުހުން ކުރަމުންދާ ތަހުގީގުތަކަށް އެޗްޑީސީގެ ފަރާތުން ފުރިހަމަ އެއްބާރުލުން ދޭނޭކަމަށާއި، ޖުމްލަ ގޮތެއްގައި މިކަންކަން ހިނގާ ގޮސްފައިވާ ކަންކަން ބަލަންޖެހޭކަމަށެވެ.
ހައުސިންނުން ނާންގާ ފަރާތަކަށް އަޅުގަނޑުމެން މިތަނުން (އެޗްޑީސީއަކުން) ބިމެއް ހަވާލުކޮށްފައެއްނުވާނެ.އެކަމުގެ ފުރިހަމަ ޔަގީންކަން އަޅުގަނޑުމެން އަރުވަން
ފަޒުލް ވިދާޅުވިއެވެ
ބިންވެރިޔާ ސްކީމުން ގޯތިތައް ދޫކުރަނީ އެޗްޑީސީން ނޫންކަމަށާއި، އެކަންކަމާއި ގުޅޭ ލިޔެކިޔުންތަކާއި އެނޫންވެސް މައުލޫމާތުތައް ހުންނާނީ ހައުސިން މިނިސްޓްރީގައިކަން ފަޒުލް ވިދާޅުވިއެވެ.
ބިންވެރިޔާ ސްކީމުގެ ލިސްޓުން ބޭރުން ހުޅުމާލެއިން ގޯތިތަކެއް ދިންކަމަށް ބުނާ މައްސަލާގައި ފުލުހުންގެ ފޮރެންސިކް ޓީމެއް މިއަދު އެޗްޑީސީއަށް ވަދެފައިވަނީ ތަހުގީގަށް ބޭނުންވާނޭ މައުލޫމާތުތައް ހޯދުމަށެވެ. ފުލުހުންގެ ޓީމް އެޗްޑީސީއަށް ވަދެފައިވަނީ ހަވީރުގެ ވަގުތެއްގައެވެ. މި މައްސަލައިގެ ޖިނާއީ ތަހުގީގެއް ހިންގަމުންދާކަމަށް ފުލުހުންވެސް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
