ބިންވެރިޔާ ސްކީމުގެ އުސޫލުން ބޭރުން ބަޔަކަށް ގޯތިދިން މައްސަލަ ބަލައިދިނުމަށް އެދި މަޖިލީހަށް މައްސަލައެއް ހުށަހަޅައިފިއެވެ.

އިދިކޮޅު އެމްޑީޕީގެ ފަރާތުން މި މައްސަލަ މަޖިލީހަށް ހުށަހެޅީ، ގަލޮޅު އުތުރު ދާއިރާގެ ފަރާތުން މަޖިލީސް ތަމްސީލް ކުރައްވަމުން ގެންދަވާ މެންބަރު މުހައްމަދު އިބްރާހިމް (ކުޑޫ) އެވެ މަޖިލީހަށް ކުޑޫ ހުށަހެޅި މައްސަލާގައި ވިދާޅުވެފައިވަނީ، ބިންވެރިޔާ ސްކީމުގެ އުސޫލްތަކުން ބޭރުން ގޯތިތައް ދޫކޮށްފައިވާ މައްސަލަ ސީރިއަސް މައްސަލައެއްގެ ގޮތުގައި ބަލަންޖެހޭކަމަށެވެ.

މަޖިލީހަށް ހުށަހެޅި މި މައްސަލާގައި ބުނެފައިވަނީ، ބިންވެރިޔާ ސްކީމުގެ އުސޫލްތަކާ ހިލާފަށް އެޗްޑީސީން ބައެއް ފަރާތްތަކަށް ގޯތިތައް ދޭކަން ހައުސިން މިނިސްޓްރީއަށް އެނގުނުތާ މިހާދުވަސް ވީއިރުވެސް އެކަން ބަލާފައިނުވާކަމަށެވެ. ސްކީމުގެ ބޭރުން މިހާތަނަށް ވަރަށް ގިނަ ފަރާތްތަކަށް އުސޫލުން ބޭރުން ގޯތިތައް ދޫކޮށްފައިވާކަން ފާހަގަކުރައްވަމުން ކުޑޫ ހުށަހެޅީ މި މައްސާގައި ވިދާޅުވެފައިވަނީ، މިފަދަ ކަންކަން އިތުރަށް ނުހިނގާނެފަދަ ގޮތަކަށް ފިޔަވަޅު އަޅަންޖެހޭކަމަށެވެ. 

Advertisement

ބިންވެރިޔާ ސްކީމުގެ މި މައްސަލައާ ގުޅިގެން މިއަދު ހަވީރު ފުލުހުންވެސް ވަނީ އެޗްޑީސީއަށް ވަދެފައެވެ. މި މައްސަލައިގެ ޖިނާއީ ތަހުގީގެއް ހިންގަމުންދާކަމަށް ފުލުހުން ބުނެފައިވާއިރު، އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދު ވަނީ ތަހުގީގީ އިދާރާތަކަށް އެކުންފުނީގެ ފުރިހަމަ އެއްބާރުލުން ދެމުންދާނޭކަމަށެވެ.

ފަޒުލް ވިދާޅުވީ، ހައުސިން މިނިސްޓްރީން ހުއްދަ ނުދޭ އެއްވެސް ފަރާތަކަށް އެޗްޑީސީއަކުން ގޯތި ދޫކޮށްފައިނުވާނޭ ކަމަށެވެ.