ހައުސިންގ ޑިވެލޮޕްމަންޓް ކޯޕަރޭޝަންއާއި ގުޅޭގޮތުން މޯލްޑިވްސް ޕޮލިސް ސަރވިސަސް އިން ކުރިޔަށް ގެންދާ ޖިނާޢީ ތަހުޤީޤާ ގުޅިގެން އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ މުޙައްމަދު ފަޒީލް ރަޝީދުވެސް ސަސްޕެންޑް ކޮށްފިއެވެ. 

އެޗްޑީސީގެ މެނޭޖިންގ ޑިރެކްޓަރ ފަޒުލްގެ އެއްބަނޑު އެއްބަފާ ބޭބެ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ޖިނާޢީ ތަހުގީގެއް ފުލުހުން ފަށާފައި ވާއިރު، މައްސަލައިގެ ތަހުގީގަށް ފުލުހުން ވަނީ އިއްޔެ ހަވީރު އެޗްޑީސީގެ އޮފީހަށް ވެސް ވަދެފައެވެ.

ފުލުހުން ތަހުގީގުކުރަމުން ޑޮކިއުމަންޓުތަކެއް ފޯޖުކޮށްފައިވާ ކަމަށް ތުހުމަތު ކުރެވޭ މައްސަލައެކެވެ. އަދި ގޯތީގެ މައްސަލައިގައި ސޯޝަލް މީޑިއާގައި ދައުރުވަމުންދަނީ ފަޒީލްގެ ނަމުގައިވާ ލިޔުމެކެވެ.

މިކަމާއި ގުޅިގެން އެމްޑަބްލިޔުއެސްސީން ބުނީ މިއަދުން ފެށިގެން ފަޒީލް ވަނީ ހުރިހާ ޒިންމާ ތަކަކުން ވަކިކޮށް އޮފީހަށް ނުނިކުމެވޭ ގޮތަށް ސަސްޕެންޑް ކުރެވިފައި ކަމަށެވެ. އަދި ފަޒީލް ސަސްޕެންޑު ކުރެވުނީ، ފުލުހުންގެ ތަހުގީގަށް ޖާގަދީ ފުރިހަމަޔަށް އެހީތެރިވުމުގެ ގޮތުން ކަމަށެވެ. 

ފަޒީލްގެ އިތުރުން، ފުލުހުން އިސްނަގައިގެން އެޗްޑީސީގައި ކުރިއަށްގެންދާ ޖިނާއީ ތަޙުޤީޤާއު ގުޅިގެން އެޗްޑީސީގެ ބޯޑުގެ ޗެއަރމަން ފިޔަވައި، އެ ކުންފުނީގެ މެނޭޖިންގ ޑިރެކްޓަރު، އަދި ފަޒީލް ގެ ކޮއްކޮ ފަޒުލް ރަޝީދާއި އެހެން ހުރިހާ މެންބަރުންވެސް ވަނީ ތަޙްްޤީޤު ނިމެންދެން ސަސްޕެންޑް ކޮށްފައެވެ.

މި މައްސަލަ އާއި ގުޅިގެން، އެޗްޑީސީގެ ޗީފް އިންޓާނަލް އޮޑިޓަރު އިއްޔެ ނެރުނު އިންޓާނަލް މެމޯއެއްގައިވަނީ، އެ ކުންފުނިން ހިންގާ މާލީ ގިނަ މުއާމަލާތްތަކެއް ވަގުތީ ގޮތުން މަޑުޖައްސާލަންވެސް އަންގައިފައެވެ.