ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ގޯތިދިން މައްސަލާގައި ފުލުހުން ތަހުގީގު ކުރަމުންދަނީ ލިޔެކިޔުން ފޯޖު ކުރި ކަމަށް ތުހުމަތުވާ މައްސަލައެއް ކަމަށް އެ އިދާރާއިން ބުނެފިއެވެ. 

އެޗްޑީސީގެ މެނޭޖިންގ ޑިރެކްޓަރ ފަޒުލްގެ އެއްބަނޑު އެއްބަފާ ބޭބެ އަދި އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ޖިނާޢީ ތަހުގީގެއް ފުލުހުން ފަށާފައި ވާއިރު، މައްސަލައިގެ ތަހުގީގަށް ފުލުހުން ވަނީ އިއްޔެ ހަވީރު އެޗްޑީސީގެ އޮފީހަށް ވެސް ވަދެފައެވެ.

އެ ތަހުގީގާއި ގުޅޭ ގޮތުން އިތުރު މައުލޫމާތު ދެމުން މިއަދު ފުލުހުން ބުނީ، މި ތަހުގީގަކީ ފުލުހުންނަށް ލިބިފައިވާ މައުލޫމާތަކާ ގުޅިގެން ފުލުހުން އިސްވެ ފަށާފައިވާ ތަހުގީގެއް ކަމަށެވެ. 

މި މައްސަލަ އާއި ގުޅިގެން، އެޗްޑީސީގެ ބޯޑުގެ ޗެއަރމަން ފިޔަވައި، އެ ކުންފުނީގެ މެނޭޖިންގ ޑިރެކްޓަރު، ފަޒުލް ރަޝީދާއި އެހެން ހުރިހާ މެންބަރުންގެ އިތުރުން، އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ މުޙައްމަދު ފަޒީލް ރަޝީދު، ވަނީ ތަޙްްޤީޤު ނިމެންދެން ސަސްޕެންޑް ކޮށްފައެވެ.

މި މައްސަލަ އާއި ގުޅިގެން، އެޗްޑީސީގެ ޗީފް އިންޓާނަލް އޮޑިޓަރު އިއްޔެ ނެރުނު އިންޓާނަލް މެމޯއެއްގައިވަނީ، އެ ކުންފުނިން ހިންގާ މާލީ ގިނަ މުއާމަލާތްތަކެއް ވަގުތީ ގޮތުން މަޑުޖައްސާލަންވެސް އަންގައިފައެވެ.