ބިންވެރިޔާ ސްކީމް މައްސަލާގައި ކޮމިޝަނަރ އޮފް ޕޮލިސް ޢަލީ ޝުޖާޢު، އެންޓި ކޮރަޕްޝަން ކޮމިޝަންގެ މެމްބަރުންނާ ބައްދަލުކުރައްވައިފިއެވެ.
އޭސީސީގެ ބޭފުޅުންނާއެކު ސީޕީ ބޭއްވި މި ބައްދަލުވުމުގައި ވަނީ، ބިންވެރިޔާ" ސްކީމާ ގުޅުންހުރި ކޮރަޕްޝަންގެ މައްސަލަ ތަހުގީގުކުރުމާ ގުޅޭގޮތުން ފުޅާދާއިރާއެއްގައި މަޝްވަރާކުރައްވާފައެވެ. މި ބައްދަލުވުމާ ގުޅޭ އިތުރު އެއްވެސް މައުލޫމާތެއް އޭސީސީ އަދި ފުލުހުންގެ މުއައްސަސާއަކުންވެސް ހާމަކޮށްފައެއް ނުވެއެވެ.
ބިންވެރިޔާ ސްކީމުގެ ދަށުން ދޫކުރި ގޯތިތަކުގެ ތެރެއިން ބައެއް ގެވަޅުތައް، އެޗްޑީސީން އުސޫލާ ހިލާފަށް ދޫކުރި މައްސަލައެއް ފެންމަތިވެ، އެކުންފުނީގެ ޗެއާމަން ފިޔަވައި ޑިރެކްޓަރުންގެ މުޅި ބޯޑް ވަނީ ސަސްޕެންޑްކޮށްފައެވެ. މި މައްސަލާގައި އެޗްޑީސީގެ އޮޑިޓަރުން ވަނީ މިވަގުތައް އެކުންފުނީގެ އެއްވެސް މާލީ މުއާމަލާތެއް ނުކުރުމަށްވެސް އަންގާފައެވެ.
މި މައްސަލާގައި އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދުގެ ބޭބެއަށް އުސޫލާ ހިލާފަށް އަސްލެއްނެތް ލިޔުންތަކެއް ބޭނުންކޮށްގެން ގެވަޅެއް ދީފައިވާ މައްސަލައެއް ވަނީ ފެންމަތިވެފައެވެ. މި ކަމާގުޅިގެން ރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ، އުސޫލާ ހިލާފަށް އެޗްޑީސީން އެއްވެސް ފަރާތަކަށް ބިން ދޫކޮށްފައި ނުވާނޭކަމަށާއި، އެކަން ކުރެވޭނީ ހައުސިން މިނިސްޓްރީއަށްކަމަށެވެ.
މި މައެްސަލާގައި އެޗްޑީސީގެ ސީނިއާ 3 މުއައްޒަފަކުވެސް މިއަދު ވަނީ ސަސްޕެންޑްކޮށްފައެވެ.
Advertisement
This content is created and paid for by advertisers and does not involve Voice Journalists
