ހައުސިން މިނިސްޓްރީ އިމާރާތުގައި ހިނގާދިޔަ އަލިފާނުގެ ހާދިސާ އާއި އެޗްޑީސީން އުސޫލްތަކާ ހިލާފަށް ގޯތިދިން މައްސަލައާ އަދި ގުޅުވެން ނެތްކަމަށް ފުލުހުން ބުނެފިއެވެ.

ބިންވެރިޔާ ސްކީމްގައި ހިމެނޭ ގޯތިތަކުން އުސޫލާ ހިލާފަށް އެޗްޑީސީން ގޯތިތަކެއް ދޫކުރި މައްސަލާގައި ފުލުހުން ކުރަމުންގެންދާ ތަހުގީގާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އެސިސްޓެންޓް ކޮމިޝަނާ އޮފް ޕޮލިސް ޢަބްދުﷲ ޝަރީފް ވިދާޅުވީ، އެޗްޑީސީ މައްސަލަ އާއި އަލިފާނުގެ ހާދިސާއާ ގުޅުމެއްވާކަން މިހާތަނަށް ފާހަގަކުރެވިފައި ނުވާކަމަށެވެ. އުސޫލާ ހިލާފަށް ގޯތި ދިން މައްސަލައިގެ ޖިނާއީ ތަހުގީގެއް ފުލުހުން ފަށާފައިވާއިރު، އޭނާ ވިދާޅުވީ ތަހުގީގު މިހާހިސާބަށް ކުރިއަށްދިޔައިރު، އެޗްޑީސީގެ ފަރާތުން ލިބެންޖެހޭ އެއްބާރުލުން ލިބެމުންދާކަމަށެވެ. މިގޮތުން މިހާތަނަށް ކުރަމުންދިޔަ މަސައްކަތުގައި އެއްވެސް ޑޮކިޔުމަންޓެއް ނުލިބޭނޭ ކަމަށް ބުނެފައިނުވާކަމަށް އޭނާ ވިދާޅުވިއެވެ.

މި މައްސަލާގައި އެޗްޑީސީން ހެކި ނައްތާލުމަށް މަސައްކަތްކުރިކަންވެސް އަދި މިހާތަނަށް ފާހަގަކުރެވިފައިނުވާކަމަށެވެ. މި މައްސަލަ މިހާތަނަށް ތަހުގީގުކުރިއިރު، ބައެއް ކަންކަން ފާހަގަކުރެވިފައިވާކަމަށް އޭނާ ވިދާޅުވިއެވެ. ފުލުހުން ވަނީ މި މައްސަލާގައި މިހާތަނަށް 6 ފަރާތަކާ ސުވާލުކޮށްފައެވެ.

Advertisement

އެސިސްޓެންޓް ކޮމިޝަނާ އޮފް ޕޮލިސް ޢަބްދުﷲ ޝަރީފް މައުލޫމާތުދެއްވަނީ.

މިގޮތުން ބިންވެރިޔާ ސްކީމުން ޝަރުތު ހަމަނުވާއިރުވެސް ބިން ނުލިބިގެން ޝަކުވާކުރުމުން ބައެއް ފަރާތްތަކަށް ގޯތި ލިބިފައިވާކަމަށާއި، އެޕާޓްމަންޓަށް އެދުނު ފަރާތްތަކަށްވެސް ގޯތި ލިބިފައިވާކަން ފާހަގަކުރެވިފައިވާކަން ޝަރީފް ވިދާޅުވިއެވެ. އަދި އެފަރާތްތަކާ ސުވާލުކުރުމުން މިކަންކަން ހިނގާފައިވަނީ ކުރީ ސަރުކާރުގެ ދުވަސްވަރުކަން ފާހަގަކުރެވިފައިވާކަމަށްވެސް ޝަރީފް ވިދާޅުވިއެވެ. މިހާތަނަށް މައްސަލަ ހުރިކަން ފާހަގަކުރެވިފައިވަނީ 3 ލޮޓެއްގައެވެ.

ބިންވެރިޔާ ސްކީމުގެ ދަށުން ދޫކުރި ގޯތިތަކުގެ ތެރެއިން ބައެއް ގެވަޅުތައް، އެޗްޑީސީން އުސޫލާ ހިލާފަށް ދޫކުރި މައްސަލައެއް ފެންމަތިވެ، އެކުންފުނީގެ ޗެއާމަން ފިޔަވައި ޑިރެކްޓަރުންގެ މުޅި ބޯޑް ވަނީ ސަސްޕެންޑްކޮށްފައެވެ. މި މައްސަލާގައި އެޗްޑީސީގެ އޮޑިޓަރުން ވަނީ މިވަގުތައް އެކުންފުނީގެ އެއްވެސް މާލީ މުއާމަލާތެއް ނުކުރުމަށްވެސް އަންގާފައެވެ. 

މި މައްސަލާގައި އެޗްޑީސީގެ މެނޭޖިންގ ޑިރެކްޓަރު ފަޒުލް ރަޝީދުގެ ބޭބެއަށް އުސޫލާ ހިލާފަށް އަސްލެއްނެތް ލިޔުންތަކެއް ބޭނުންކޮށްގެން ގެވަޅެއް ދީފައިވާ މައްސަލައެއް ވަނީ ފެންމަތިވެފައެވެ. މި ކަމާގުޅިގެން ރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ، އުސޫލާ ހިލާފަށް އެޗްޑީސީން އެއްވެސް ފަރާތަކަށް ބިން ދޫކޮށްފައި ނުވާނޭކަމަށާއި، އެކަން ކުރެވޭނީ ހައުސިން މިނިސްޓްރީއަށްކަމަށެވެ.

މި މައެްސަލާގައި އެޗްޑީސީގެ ސީނިއާ 3 މުއައްޒަފަކުވެސް މިއަދު ވަނީ ސަސްޕެންޑްކޮށްފައެވެ.