މާލޭ، އަލިކިލެގެފާނު މަގުން ސައިކަލެއްގައި ދިޔަ އަންހެނެއްގެ އަތުން ފޭރެން މަސައްކަތްކުރި މައްސަލާގައި މީހަކު ހައްޔަރުކޮށްފިއެވެ.

އެ މައްސަލާގައި ހައްޔަރުކޮށްފައި ވަނީ އުމުރުން 30 އަހަރުގެ ވ. ފިޔަބަރި، މާލެ، ހަސަން އިސާމެވެ. އޭނާ ހައްޔަރު ކުރީ އިއްޔެ ހަވީރު 17:20 ހާއިރުއެވެ.

އިސާމްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 7 ދުވަސް ޖަހާފައިވާ ކަމަށް ފުލުހުން ބުންޏެވެ. 

ފުލުހުން ގެންދަނީ މި މައްސަލަ ތަހުގީގު ކުރަމުންނެވެ. 

އިސާމް ފޭރެން އުޅުނު މަންޒަރު ފެންނަ ވީޑިއޯ މީސްމީޑިއާގައި އާއްމުވެފައިވާއިރު، އެއިން ފެންނަ ގޮތުން، ސައިކަލުގައި ދިޔަ އަންހެން މީހާއާ އަރާ ހަމަކުރުމަށްފަހު، އޭނާ މަސައްކަތް ކުރީ އަންހެން މީހާގެ ކަރުގައި އޮތް ފަށް ފޭރުމަށެވެ. އެކަން އޭނާއަށް ނުވުމުން, ސައިކަލުން ފައިބައި އަންހެން މީހާގެ އަތްދަބަސް ފޭރެން މަސައްކަތް ކުރެއެވެ.

ނަމަވެސް އަންހެން މީހާ މަގުގެ އެއްފަރާތު ގޯޅިތެރެއަށް ދުވެފައި ދިޔުމުން ފިރިހެން މީހާ ވަނީ ސައިކަލަށް އަރައި، އެ ތަނުން ފިލާފައެވެ.