ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުކަމުގެ މަގާމުން ފަޒުލް ރަޝީދު އިސްތިއުފާދެއްވައިފިއެވެ.
ފަޒުލް އިސްތިއުފާދެއްވިއިރު، ބިންވެރިޔާ ސްކީމުގެ ތެރެއިން އުސޫލާ ހިލާފަށް ގެވަޅު ދޫކުރި މައްސަލާގައި އޭނާ ހުންނެވީ ސަސްޕެންޝަނުގައެވެ. ވޮއިސްއަށް މައުލޫމާތު ލިބިފައިވާ ގޮތުގައި ފަޒުލް އިސްތިއުފާދެއްވީ ތަހުގީގު ކުރިއަށްދާތީވެ، އެކަމަށް އެއްބާރުލުން ދެއްވުމުގެ ގޮތުންނެވެ. މި މައްސަލާގައި ފަޒުލްގެ ޕާސްޕޯޓުވެސް ވަނީ ހިފަހައްޓާފައެވެ.
ފަޒުލް އިސްތިއުފާގެ ސިޓީ ރައީސުލްޖުމްހޫރިއްޔާގެ އޮފީހަށް ފޮނުވިނަމަވެސް ރައީސް އޮފީސް، އަދި ސަރުކާރުގެ ކުންފުނިތަކުގެ ބަލަދުވެރިފަރާތް ޕީސީބީއަކުންވެސް އަދި މިކަމާގުޅޭގޮތުން ވަކިއެއްޗެކޭ ބުނެފައެއް ނުވެއެވެ.
ފަޒުލް އިސްތިއުފާ ދެއްވިއިރު، އޭނާގެ ބޭބެއަށް އުސޫލާ ހިލާފަށް އެޗްޑީސީގެ ތެރެއިން ސައްހަނޫން ލިޔުންތަކެއް ބޭނުންކޮށްގެން ގޯއްޗެއް ދިން މައްސަލަ ވަނީ ފެންމަތިވެފައެވެ. މި މައްސަލަ ފުލުހުން ޖިނާއީ މައްސަލައެއްގެ ގޮތުގައި ބަލަމުންދާއިރު، ޕީސީބީން ވަނީ އެޗްޑީސީގެ ޗެއާމަން ފިޔަވައި ހުރިހާ ޑިރެކްޓަރުން ސަސްޕެންޑްކޮށްފައެވެ. އެޗްޑީސީގެ ތެރެއިން އުސޫލާ ހިލާފަށް ހުޅުމާލެއިން ބިންދޫކުރި މައްސަލާގައި އެކުންފުނީގެ ސީނިއާ ހަތަރު މުއައްޒަފަކުވެސް ފަނީ ސަސްޕެންޑްކޮށްފައެވެ. މީގެ އިތުރުން މި މައްސަލާގައި އެކުންފުނީގެ އޮޑިޓަރު ވަނީ ކުންފުނީގެ މާލީ މުއާމަލާތްތައްވެސް ހުއްޓާލުމަށް އަންގާފައެވެ.
ފަޒުލްގެ ބޭބެއަށް އެޗްޑީސީން ގޯތި ދިންކަމަށް ދެކެވެމުންދާ ވާހަކަތަކާ ގުޅޭގޮތުން ފަޒުލް ވިދާޅުވީ، އެފަދަ ކަމެއް ކޮށްފައި ނުވާނޭކަމަށާއި، ބިންވެރިޔާ ސްކީމުން ގޯތި ދިނުމުގައި މައްސަލައެއް އުޅޭކަން ފާހަގަކުރެވިގެން އެކަން ހައުސިން މިނިސްޓްރީގެ ސަމާލުކަމަށް ގެނައީވެސް އެޗްޑީސީން ކަމަށެވެ.
Advertisement
This content is created and paid for by advertisers and does not involve Voice Journalists
