އިގިރޭސި ޕްރެމިއާ ލީގުގައި އާދިއްތަ ދުވަހުގެ ރޭ ރަށުން ބޭރުގައި ޓޮޓެންހަމް އާއި ދެކޮޅަށް ކުޅުނު މެޗު 6-3 ގެ ނަތީޖާއަކުން ކާމިޔާބުކޮށް ލިވަޕޫލުން ލީގު ތާވަލުގެ ކުރީގައި ހަތަރު ޕޮއިންޓްގެ ލީޑެއްނަގައިފިއެވެ.

ލީގުގައި ލިވަޕޫލް އެންމެ ފަހުން ކުޅުނު މެޗުގައި 2-1 ގެ ނަތީޖާއަކުން ސައުތުހެމްޓަން އަތުން މޮޅުވެފައިވާއިރު, ޓޮޓެންހަމް އެންމެ ފަހުން ކުޅުނު މެޗުގައި އެޓީމުން ވަނީ 3-4 ގެ ނަތީޖާއަކުން މެންޗެސްޓާ ޔުނައިޓެޑް ބަލިކޮށްފައެވެ.

މެޗުގެ ފުރަތަމަ ހާފުގައި މޮޅަށް ކުޅެ ލިވަޕޫލް މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 3-1 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ. ނަމަވެސް މެޗުގެ ދެވަނަ ހާފުގައި ދެޓީމުގެ ފަރާތުން ފެނިގެން ގޮސްފައި ވަނީ ވަރަށް ވާދަވެރި ކުޅުމެކެވެ. އަދި މިހާފުގައި ލިވަޕޫލުން އިތުރު ތިންލަނޑު ކާމިޔާބުކުރިއިރު، ޓޮޓެންހަމް އިން ވެސް ވަނީ އިތުރު ދެލަނޑު ކާމިޔާބުކޮށްފައެވެ.

Advertisement

އެގޮތުން މިމެޗުގައި ލިވަޕޫލުގެ މުހައްމަދު ސަލާހު އަދި ލުއިސް ޑިއާޒް މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، އެޓީމުގެ ޑޮމެނިކް ސްބޮސްޒްލާއި އަދި އެލެކްސިސް މާކް އެލިސްޓާ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ޓޮޓެންހަމްގެ ޑޮމަނިކް ސޮލަންކޭ، ޖޭމް މެޑިސަން އަދި ޑެޖަން ކުލުސެވްސްކީ މިއިން ކޮންމެ ކުޅުންތެރިއަކު އެއްލަނޑު ކާމިޔާބުޖުރިއިރު، މިމެޗުގެ މޮޅު ކުޅުންތެރިއަރަކަށް ހޮވުނީ ލިވަޕޫލްގެ މުހައްމަދު ސަލާހް އެވެ. އޭނާ ވަނީ މިމެޗުގައި ދެލަނޑު ކާމިޔާބުކުރުމުގެ އިތުރުން އިތުރު ދެލަނޑު ޖެހުމަށް އެހީތެރިވެދީފައެވެ.

މިނަތީޖާއެކު ލީގުގައި ކުޅުނު 16 މެޗުން ލިވަޕޫލަށް 39 ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލުގެ އެއްވަނައިގައެވެ. އަދި މިމެޗުން ބަލިވި ޓޮޓެންހަމް ލީގުގައި ކުޅުނު 17 މެޗުން ލިބުނު 23 ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ 11 ވަނައިގައެވެ.