މިދިޔަ ނޮވެމްބަރު މަހު މަރުވި ނޭޕާލް މީހާގެ ހަށިގަނޑު އަދިވެސް އޮތީ މޯޗަރީގައި ކަމަށާއި، މައްސަލަ ތަހުގީގުކުރަމުން އަންނަ ކަމަށް ފުލުހުން ބުނެފިއެވެ.

ފުލުހުން ބުނީ، އަިއޖީއެމްއެޗް އީއާރަށް ގެނައި ނޭޕާލް ރައްޔިތެއްކަމަށްވާ 25 އަހަރުގެ ކަންޗަން ދުންގެލް ނިޔާވެފައިވާ މައްސަލަ ނޮވެމްބަރު މަހުގެ 9 ވަނަ ދުވަހު ފުލުހުންނަށް ރިޕޯޓްކޮށްފައިވާކަމަށެވެ.

ތަހުގީގަށް އެނގިފައިވާގޮތުގައި، ކަންޗަން ދުންގެލް ހޮސްޕިޓަލަށް ގެނެސްފައިވަނީ ވަރަށް ބޮޑަށް ބަނޑުގައި ރިއްސަން ފެށުމުން ކަމަށާއި، ހޮސްޕިޓަލަށް ގެނައުމުގެ މަގުމަތީގައި އޭނާގެ ހަބަރު ހުސްވިކަން ފާހަގަކުރެވިފައިވާކަމަށް ފުލުހުން ބުނެއެވެ.

Advertisement

ފުލުހުން ހާމަކުރި ގޮތުގައި، މެޑިކޯ ލީގަލް ރެޕޯޓްގައި ކަންޗަން ދުންގެލް މަރުވި ސަބަބު ނޭނގޭކަމަށް ވަނީ ބަޔާންކޮށްފައެވެ. މި ރިޕޯޓްގައި އޭނާ އަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަކޮށްފައިނުވާކަމަށާއި، ކަންޗަން ދުންގެލް އަކީ އެނީމިއާ ގެ ހިސްޓްރީ އޮތް އޮތް މީހެއްކަން އެނގިފައިވާކަމަށް ފުލުހުން ބުނެއެވެ.

ފުލުހުން ބުނީ، އޭނާގެ ހަށިގަނޑާއި ސްޕޮންސަރ ގެ ފަރާތުން ހަވާލުވެފައިނުވާތީ، ކަންޗަނ ދުންގެލް ގެ ހަށިގަނޑު ފުލުހުންގެ ހަވާލުގައި މޯޗަރީއަށް ގެންގޮސްފައިވާކަމަށާއި، މި މައްސަލަ ތަހުގީގުކުރަމުން އަންނަ ކަމަށެވެ.