ދިވެހި ރާއްޖޭގެ ޒަކާތު ފަންޑުގެ އެހީގައި ފަލަސްތީނުގެ ޣައްޒާގެ މުސްލިމުންނަށް ފެން ފޯރުކޮށްދީފިއެވެ.

މިކަމާއި ގުޅޭގޮތުން އިސްލާމީ ކަންތައްތަކާއި ބެހޭ ވަޒީރު، ޑރ.މުޙައްމަދު ޝަހީމް އަލީ ސައީދު ވިދާޅުވީ، ދިވެހިރާއްޖޭގެ ޒަކާތު ހައުސްގެ އެހީ ޣައްޒާގެ އަޚުންނާއި އުޚުތުންނާ ހަމަ އަށް ވާޞިލްވެފައިވާކަމަށެވެ.

މި އެހީ އިން ހޭދަކުރަނީ ބޯ ފެން ބޭނުންވެފައިވާ އަޚުންނާއި އުޚުތުންނަށް ބޯ ފެން ފޯރުކޮށްދިނުމަށް ކަމަށާއި، އެހީ ތަންފީޒުކުރަމުން ދަނީ ޤަތަރުގެ ރެޑްކްރެސެންޓް މެދުވެރިކޮށްކަމަށް ވަޒީރު ޝަހީމް ވިދާޅުވިއެވެ.

މިއީ ރާއްޖޭގެ ޒަކާތުގެ އިދާރާއިން ބޭރުގައި ޙާލުގައި ޖެހިފައިވާ ބަޔަކަށް އެހީވާ ފުރަތަމަ ފަހަރުކަން ފާހަގަކުރައްވާ ވަޒީރު ޝަހީމް ވިދާޅުވީ، މިއީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިރުޝާދުގެ ދަށުން އިސްލާމީ ކަންތައްތަކާއި ބެހޭ ވުޒާރާއިން ކުރިއަށް ގެންދާ ކަމެއް ކަމަށެވެ.

މިކަމާއި ގުޅޭގޮތުން ޤަތަރުގެ ރެޑްކްރެސެންޓުން ހާމަކޮށްފައިވާ މައުލޫމާތަށް ބަލާއިރު، އަލް ޝިފާ އަދި އަލް ހަޔާތު ހޮސްޕިޓަލްގައި ތިބި ބަލިމީހުންނަށް ވަނީ 6،000 ކޭސް ފެން ފޯރުކޮށްދީފައެވެ.

ހަމައެއާއިއެކު، ޒަކާތު ފަންޑުގެ އެހީގައި 60،000 ފަލަސްޠީންގެ މުސްލިމުންނަށް 50،000 ފެން ކޭސް ފޯރުކޮށްދިނުމަށް ވަނީ ހަމަޖެހިފައިވާކަމަށް ތަރުގެ ރެޑްކްރެސެންޓުން ހާމަކުރެއެވެ.