އިންޑިއާގެ ކުރީގެ ބޮޑުވަޒީރު މަންމޯހަން ސިންހް މިއަދު އަވަހާރަވެއްޖެއެވެ.

އިންޑިއާގެ ބޮޑުވަޒީރުކަމުގެ މަގާމު ދެ ދައުރު ފުރިހަމަ ކުރެއްވި މަންމޯހަން ސިންހް އަވަހާރަވީ، ވެރިރަށް ނިއުދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އައިމްސް)ގެ އެމާޖެންސީ ވޯޑުގައި ފަރުވާދެމުންދަނިކޮށެވެ. އަވަހާރަވީއިރު، އުމުރުފުޅަކީ 92 އަހަރެވެ. އިންޑިއާގެ ބައެއް ނޫސްތަކުން ބުނީ، މަންމޯހަން ސިންހް އަވަހާރަވީ ސަބަބެއް ސީދާ ސާފްނުވާކަމަށެވެ. މަންމޯހަން ސިންހްގެ ސިއްހީ ހާލަތު ގޯސްކަމަށް ވިދާޅުވެ، މީގެކުރިން އެމަނިކްފާނުގެ ގާތް ބޭބޭފުޅުންވަނީ އެކަމުގެ ކަންބޮޑުވުން ފާޅުކުރައްވާފައެވެ. 

މަންމޯހަން ސިންހް ވަނީ މީގެކުރިން ހިތުގެ ބައިޕާސް އޮޕަރޭޝަނެއްވެސް ކުރައްވާފައެވެ. އެ އޮޕަރޭޝަނަށް އެތައްފަހަރަކު އެމަނިކުފާނު ފަރުވާ ހޯއްދަވާފައިވާއިވާކަން އިންޑިއާގެ މީޑިއާތަކުން ވަނީ ރިޕޯޓްކޮށްފައެވެ.

މަންމޯހަން ސިންހް އިންޑިއާގެ ބޮޑުވަޒީރުކަން ކުރެއްވީ 2004 ވަނަ އަހަރުން ފެށިގެން 2014 ވަނަ އަހަރުގެ ނިޔަލަށެވެ. ގިނަ ބަޔަކު ފާހަގަކުރާގޮތުގައި އެމަނިކުފާނަކީ އިންޑިއާ އިންޑިއާ މިއަދު މިދެކޭ އިގްތިސާދީ ބަދަލު ގެނައުމުގައި ފާހަގަކޮށްލެވޭފަދަ ސިޔާސަތުތަކެއް ތައާރަފްކޮށްދެއްވި ބޭފުޅެކެވެ.

މަންމޯހަން ސިންހް ވަނީ ފިނޭންސް މިނިސްޓަރުކަމުގެ އިތުރުން އެޤައުމުގެ ގާނޫނު ހަދާ މަޖިލީހުގެ މެމްބަރުކަންވެސް ކުރައްވާފައެވެ. މީގެ އިތުރުން ރިޒާވް ބޭންކް އޮފް އިންޑިއާގެ ގަވަރުނަރުކަމުގެ މަގާމުވެސް އެމަނިކުފާނު 1982 ވަނަ އަހަރުން ފެށިގެން 1985 ވަނަ އަހަރުގެ ނިޔަލަށް ވަނީ ފުރުއްވާފައެވެ.