އިގްތިސާދީ ގުޅުންތައް ވަރުގަދަކުރުމަށް އުފައްދާފައިވާ ބްރިކްސް ޖަމްއިއްޔާއަށް ވަނުމުގެ ޝައުގުވެރިކަން ފާޅުކޮށް، ލަންކާގެ ރައީސް އަނޫރާ ކުމާރަ ޑިސަނަޔަކަ، ރަޝިޔާގެ ރައީސް ވްލަޑިމިއަރ ޕުޓިންއަށް ސިޓީފުޅެއް ފޮނުއްވައިފިއެވެ.
ބްރިކްސްއަށް ވަނުމަށް ރަޝިޔާގެ ރުހުން ބޭނުންވާކަމަށް ވިދާޅުވެ، ޑިސަނަޔަކަ ޕުޓިންއަށް ސިޓީފުޅެއް ފޮނުއްވާފައިވަނީ އޮކްޓޯބަރު މަހުއެވެ. އަދި ބްރިކްސްގެ އެހެން މެމްބަރު ގައުމުތަކަށްވެސް، އެޖަމްއިއްޔާއަށް ލަންކާއިން ވަންނަން ބޭނުންވާކަން އަންގައި، އެގައުމުތަކުގެ އެއްބާރުލުން ހޯދުމަށް ސިޓީ ފޮނުވާފައިވެއެވެ.
ލަންކާގެ ކުރީ ސަރުކާރުންވެސް ބްރިކްސްއަށް ވަނުމުގެ ޝައުގުވެރިކަން ފާޅުކޮށް، އިންޑިއާގެ އެހީއަށް އެދިފައިވެއެވެ.
ޑިސަނަޔަކަގެ ސަރުކާރުން ވެރިކަމާ ހަވާލުވުމާއެކު، ލަންކާގެ ޚާރިޖީ ވަޒީރު ވިޖިތަ ހެރަތު ވަނީ ލަންކާއިން ބްރިކްސް އަދި ނިއު ޑިވެލޮޕްމަންޓް ބޭންކްގެ މެމްބަރަކަށް ވުމަށް ޝައުގުވެރިވާކަން ފާޅުކޮށްފައެވެ.
ބްރިކްގެ ނަމުގައި މިޖަމްއިއްޔާ އުފެދުނީ 2009 ވަނަ އަހަރު ރަޝިޔާގައި ބޭއްވި ސަމިޓަކާއެކުގައެވެ. ބްރިކް މި ބަހަކީ ޖަމްއިއްޔާގެ އޭރުގެ މެމްބަރު ހަތަރު ގައުމުގެ ފެށޭ އަކުރުގެ މައްޗަށް ބިނާކުރެވުނު ބަހެކެވެ. އެންމެ ފުރަތަމަ ސަމިޓްގައި ބައިވެރިވީ ބްރެޒިލް، ރަޝިޔާ، އިންޑިއާ އަދި ޗައިނާއެވެ. އަދި 2010 ވަނަ އަހަރު ދެކުނު އެފްރިކާ މި ޖަމްއިއްޔާއާ ގުޅުމުން، ޖަމްއިއްޔާއިން ނަން ބްރިކް އިން ބްރިކްސް އަށް ބަދަލުކުރިއެވެ. އޭގެ ފަހުގައި އެޖަމްއިއްޔާއަށް އަލަށް އިތުރުވި ގައުމުތަކަކީ އީރާން، މިސްރު، އިތިއޯޕިއާ އަދި ޔުނައިޓެޑް އަރަބް އެމިރޭޓްސްއެވެ. މިގައުމުތަކުން ބައިވެރިވެގެން ބޭއްވި ފުރަތަމަ ބްރިކްސް ސަމިޓް ބާއްވާފައިވަނީ މިއަހަރު ރަޝިޔާގައެވެ.
Advertisement
This content is created and paid for by advertisers and does not involve Voice Journalists
