ދުނިޔޭގެ ބާޒާރުގައި ތެލަށް އޮތް ޑިމާންޑް އިތުރުވުމުގައި 2035 ވަނަ އަހަރާއި ހަމަޔަށް އިންޑިއާއިން އިސް ރޯލެއް އަދާކުރަމުންދާނެކަމަށް އިންޓަނޭޝަނަލް އެނަރޖީ އެޖެންސީއިން ބުނެފިއެވެ.

އެ އިދާރާއިން ދާދިފަހުން ނެރުނު ރިޕޯޓެއްގައި ބުނީ ދުވާލަކަށް އިތުރު 2 މިލިއަން ފީފާގެ ތެޔޮ ބާޒާރަށް ނެރުމުގެ ޑިމާންޑް އުފެއްދުމުގެ ގާބިލްކަން އިންޑިއާއަށް ލިބިގެންވާކަމަށާއި، އެހެންކަމުން ތެލުގެ ބާޒާރުގައި ޑިމާންޑް އުފެއްދުމުގެ މައިގަނޑު ބާރަކީ މިހާރު އިންޑިއާކަމަށެވެ.

މީގެ ކުރިން ތެލުގެ ބާޒާރުގައި ޗައިނާއިން އަދާކުރަމުން އައި ރޯލަށް މަޑުޖެހުމެއް އައީ އެއްގަމު އުޅަނދުފަހަރު ގަތުމުގައި ޗައިނާގެ ކަސްޓަމަރުން އިލެކްޓްރިކް ވެހިކަލަށް ބަދަލުވުން އިތުރުވުމުންނެވެ. އަންދާޒާކުރެވޭ ގޮތުގައި އެއްގަމު އުޅަނދު ފަހަރުގައި ތެޔޮ ބޭނުންކުރުން ޗައިނާގައި ދުވަހެއް ދުވަހަކަށް ދަށަށް ދާނެއެވެ.

ދުނިޔޭގެ ބާޒާރުގައި ތެލުގެ ޑިމާންޑް ކުޑަވެ، 2030 ވަނަ އަހަރު އަންނައިރު ބާޒާރުގައި އޯވަރ ސަޕްލައި މައްސަލަ ދިމާވާނެކަމަށް ދިރާސާކުރާ ފަރާތްތަކުން ލަފާކުރެއެވެ. މީގެ އިތުރުން ދުނިޔޭގެ މަސްރަހުގައި ހިނގަމުންދާ ކަންކަމުގެ ސަބަބުން ކުރުރާސްތާ ގޮންޖެހުންތަކާ ތެލުގެ ބާޒާރަށް ކުރިމަތިލާންޖެހޭނެކަން އެނަރޖީ އެޖެންސީގެ ރިޕޯޓްގައި ފާހަގަކޮށްފައިވެއެވެ. ޚާއްސަކޮށް ދުނިޔޭގެ ގައުމުތަކަށް އުފުލާ ތެލާއި ގޭހުގެ 20 އިންސައްތަ ދަތުރުކުރަނީ ޚޮރުމޫޒު ކަނޑުއޮޅިންކަމަށްވެފައި، މެދުއިރުމަތީގެ މަސްރަހު ގޯސްވާ ކޮންމެ ފަހަރަކު އެކަނޑު އޮޅިން ތެލާއި ގޭސް އުފުލުގައި ދިމާވާ ގޮންޖެހުންތަކަކީވެސް ވިސްނަން ޖެހޭ ކަންތަކެކެވެ.