ރޭގެ އެކްސިޑެންޓާ ގުޅިގެން، ފުލުހުންގެ ކާރު ދުއްވި އޮފިސަރުގެ އިހުމާލެއް އޮތްތޯ ބަލަމުން ގެންދާކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.

ރޭ ގާތްގަނޑަކަށް01:50 ހާއިރު ހުޅުމާލެ ފޭސް ދޭއް ނިރޮޅުމަގުގައި ފުލުހުންގެ ކާރަކާއި ސައިކަލެއް ޖެހި ވަނީ، ނުރައްކާތެރި އެކްސިޑެންޓެއް ހިނގާފައެވެ. މި އެކްސިޑެންޓުގައި ސައިކަލް ދުއްވަން އިނީ 18 އަހަރުގެ ޒުވާނެކެވެ. 

އެކްސިޑެންޓާ ގުޅިގެން ފުލުހުން މިއަދު ނެރުނު ބަޔާނުގައި ބުނީ، އަނިޔާ ލިބުނު މީހާއަށް ހުޅުމާލޭ ހޮސްޕިޓަލުގައި ފަރުވާދިނުމަށްފަހު މިހާރު އައިޖީއެމްއެޗަށް ބަދަލުކޮށްފައިވާކަމަށެވެ. އޭނާއަށް ބޮޑެތި އަނިޔާތަކެއް ލިބުނުއިރު، ފަރުވާދެނީ ވެންޓިލޭޓަރުގައި ބާއްވައިގެންކަމަށް ފުލުހުން ބުންޏެވެ. ފުލުހުން ބުނީ، އެކްސިޑެންޓުވި ސައިކަލް ދުއްވާފައިވަނީ އެއްގަމު ދަތުރުފަތުރު ކުރުމުގެ ގާނޫނާ ހިލާފްވެގެން އެ ގާނޫނުގެ ދަށުން މިހިނގާ ޑިސެމްބަރުމަހުގެ 21 ވަނަ ދުވަހު ލައިސަންސް ހިފަހައްޓާފައިވާ މީހެއް ކަމަށެވެ. 

ފުލުހުން ބުނީ މިފަދަ އެކްސިޑެންޓްތައް ހިނގުމަކީ ނުހަނު ކަންބޮޑުވާ އަދި ހިތާމަކުރާ ކަމެއްކަމަށާއި، މިފަދަ އެކްސިޑެންޓްތައް ހުއްޓުވުމަށް ލިބިފައިވާ ވަސީލަތްތައް ބޭނުންކޮށްގެން މަސައްކަތްކުރަމުން އަންނަކަމަށެވެ. މި އެކްސިޑެންޓުގައި ފުލުހުންގެ ކާރު ދުއްވި އޮފިސަރުގެ އިހުމާލެއް އޮތްތޯ ބަލަމުން އަންނަ ކަމަށާއި، މިފަދަ ނުރައްކާތެރި އެކްސިޑެންޓުތައް ތަކުރާރުވިޔަ ނުދިނުމަށްޓަކައި އަޅަންޖެހޭ އެންމެހާ ފިޔަވަޅުތައް އަޅާނެކަމުގެ ޔަގީންކަންދޭ ކަމަށްވެސް ފުލުހުން ބުންޏެވެ.