ކ. ދިއްފުށީ ކައުންސިލް އިދާރާގެ އާމްދަނީއަށް ލިބެންޖެހޭ 4.9 މިލިއަން ރުފިޔާ ހޯދުމަށް ކައުންސިލުން އެކަށީގެންވާ ފިޔަވަޅުތައް އަޅާފައި ނުވާކަމަށް އޮޑިޓް އޮފީހުން ބުނެފިއެވެ.

އޮޑިޓް އޮފީހުން ނެރެ އާއްމުކޮށްފައިވާ މާލެ އަތޮޅު ދިއްފުށީ ކައުންސިލް އިދާރާގެ 2022 ވަނަ އަހަރުގެ ފައިނޭންޝަލް އޮޑިޓް ރިޕޯޓްގައި ކައުންސިލް އިދާރާއަށް އާމްދަނީގެ ގޮތުގައި ލިބެންޖެހޭ ގިނަ އަދަދެއްގެ ފައިސާ ނުލިބިވާކަން ވަނީ ފާހަގަކޮށްފައެވެ. މިކަމާ ގުޅޭގޮތުން އޮޑިޓް ރިޕޯޓްގައި ބުނެފައިވަނީ، ދިއްފުށީ ކައުންސިލް އިދާރާއަށް 2022 ވަނަ އަހަރުގެ ނިޔަލަށް ލިބެންޖެހޭ 4،912،880 ރުފިޔާ ހޯދުމަށްޓަކައި ގަވާއިދުގައި ބަޔާންކޮށްފައިވާ ގޮތަށް އެކަށީގެންވާ ފިޔަވަޅުތަކެއް އަޅާފައި ނުވާކަމަށެވެ. މިއަދަދުގެ ތެރޭގައި އެއް އަހަރަށްވުރެ ގިނަ ދުަވސްވެފައިވާ 4.7 މިލިއަން ރުފިޔާ ހިމެނޭކަމަށް އޮޑިޓަރު ވަނީ ފާހަގަކުރައްވާފައެވެ.

މި ރިޕޯޓްގައިވާގޮތުން ލިބެންޖެހޭ ފައިސާގެ ތެރެއިން ގިރާ ސަރަހައްދު ހިމާޔަތްކުރުމަށް ހަރަދުކޮށް އަނބުރާ ލިބެންޖެހޭކަމަށް ޝަރުއީ ކޯޓުން ހުކުމްކޮށްފައިވާ 380،000 ރުފިޔާގެ އިތުރުން އެހެނިހެން ފައިސާ ހޯދުމަށްޓަކައި ފައިސާ ދައްކަންޖެހޭ ފަރާތްތަކަށް ފައިސާ ދައްކަންޖެހޭކަން ހަނދާންކޮށްދިނުން ފިޔަވައި އިތުރު ފިޔަވަޅެއް އަޅާފއި ނުވާކަން ރިޕޯޓްގައި ވަނީ ބުނެފައެވެ. އަދި ކޯޓުން 380،000 ރުފިޔާ ދައްކަން ހުކުމެއް ކުރިނަމަވެސް މި ފައިސާގެ އެއްވެސް މިންވަރެއް މިހާތަނަށްވެސް ކައުންސިލް އިދާރާއަށް ލިބިފައެއް ނުވެއެވެ. 

- އޮޑިދޯނިފަހަރު ބަނުމަށް ތަރައްޤީކޮށްފައިވާ ތަންތަނުން ލިބެންޖެހޭ: 3.8 މިލިއަން ރުފިޔާ

- ދިއްފުށީ ބަނދަރު ގިރާ ސަރަހައްދު ހިމާޔަތްކުރުމަށް ދޫކުރި ފައިސާއިން ލިބެންޖެހޭ: 380،000 ރުފިޔާ

- އެލީޒިއާ ޔޮޓް ގަވާއިދާ ހިލާފަށް އެޅުމުން ކުރި ޖޫރިމަނާއިން ލިބެންޖެހޭ: 384،000 ރުފިޔާ

- އަމިއްލަ ފަރާތަކަސް ދޯނި ބަނުމަށް ދޫކުރި ހަރުގެއިން ލިބެންޖެހޭ: 109،375 ރުފިޔާ

ދިއްފުށި ކައުންސިލްގެ އޮޑިޓް ރިޕޯތްގައި އިތުރަށް ފާހަގަކޮށްފައިވާ ކަންކަމުގެ ތެރޭގައި އެހީދޭނޭ ގޮތުގެ ގަވާއިދެއް ތައްޔާރުނުކޮށް މަސްލަހަތު ފުށުއަރާގޮތަށް 85،000 ހާސް ރުފިޔާ ދޫކުރި މައްސަލައެއްވެސް ވަނީ ފާހަގަކޮށްފައެވެ. މީގެ އިތުރުން ކައުންސިލް މެމްބަރުންގެ ވިޔަފާރިއާ ބެހޭ މައުލޫމާތު ހުށަހަޅާފައި ނުވުމާއި، މެމްބަރުން ބޭރަށްދާ ގަޑި ހާޒިރީގައި ނޯޓް ނުކުރުން ފަދަ މައްސަލަތައް ވަނީ އޮޑިޓް ރިޕޯޓްގައި ފާހަގަކޮށްފައެވެ.