ސްރީލަންކާގެ އަމާޒަކީ އަންނަ އަހަރުގެ ތެރޭގައި އެޤައުމަށް 3 މިލިއަން ފަތުރުވެރިން ގެނައުންކަމަށް އެޤައުމުގެ ސަރުކާރުން ބުނެފިއެވެ.

އަވައްޓެރި ސްރީލަންކާއިން ވަނީ މިދިޔަ ހޮނިހިރު ދުވަހު އެ ޤައުމަށް ޒިޔާރަތްކުރި 2 މިލިއަން ވަނަ ފަތުރުވެރިޔާއަށް މަރުހަބާކިޔާފައެވެ. މިކަމާ ގުޅިގެން ސްރީލަންކާގެ ޓޫރިޒަމް މިނިސްޓަރުގެ ނައިބު ޕްރޮފެސަރު ރުވާން ޗަމިންދަރ ރަނާ ސިންހެ ވަނީ މިއީ ހުރިހާ އެންމެންވެގެން ކުރި މަސައްކަތުން ލިބުނު ކާމިޔާބެއްކަމަށް ސިފަކުރައްވާފައެވެ. އޭނާ ވިދާޅުވެފައިވަނީ ލަންކާގެ އަމާޒަކީ އަންނަ އަހަރު ނިމޭއިރު 3 މިލިއަން ޓޫރިސްޓުން ގެނައުންކަމަށެވެ.

ސްރީލަންކާގެ ޓޫރިޒަމް ފައްކާކުރުމުގައި އެޤައުމުގެ އިދިކޮޅު ފަރާތްތަކުންވެސް ސަރުކާރަށް އެއްބާރުލުން ދެމުންގެންދާއިރު، އެންމެފަހުން ޓޫރިޒަމް މިނިސްޓަރަކަށް ހުންނެވި ހަރިން ފެނާންޑޯ އެކްސްގައި ކުރެއްވި ޕޯސްޓެއްގައި ވިދާޅުވީ، ލަންކާއިން މިއަހަރު ދެ މިލިއަން ޓޫރިސްޓުން އައުމަކީ ލަންކާގެ ރައްޔިތުން ކުރި ވަރަށް ބުރަ މަސައްކަތުގެ ނަތީޖާއެއް ކަމަށެވެ. ސްރީލަންކާއިން މި އަމާޒަށް ވާސިލްވުމުގެ މަސައްކަތް ފެށީ ސުމަކުންކަން ފާހަގަކުރައްވަމުން އޭނާ ވިދާޅުވީ، 2022 ވަނަ އަހަަރު ނިމުނުއިރު އެޤައުމަށް އުދުހެމުންދިޔައީ ވަރަށް މަދު އެއާލައިނަކުން ކަމަށެވެ.

މިދިޔަ 5 އަހަރެއްހާ ދުވަހުގެ ތެރޭގައި ސްރީލަންކާގެ ޓޫރިޒަމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. މިގޮތުން 2019 ވަނަ އަހަރުގެ އޭޕްރިލްމަހުގެ 21 ވަނަ ދުވަހު ދިން އީސްޓާ ބޮމުގެ ހަމަލާގައި ލަންކާގެ ޓޫރިޒަމަށް ވަރަށްބޮޑަށް ލޮޅުން އަރައިގެންދިޔައިރު، އޭގެ ފަހުން އެއަހަރުގެ ފަހުކޮޅު ކުރިމަތިވި ކޮވިޑްގެ ސަބަބުން ލަންކާގެ ޓޫރިޒަމް މުޅިންހެން ހުއްޓުމަކަށް އައެވެ. ކޮވިޑަށްފަހު ހަމަޖެހިލަން ލިބުނު ދަނޑިވަޅުގައި އެޤައުމަށް ދިމާވި މާލީ މައްސަލަތަކާހުރެ ޓޫރިޒަމް ސިނާއަތުގެ ދުވެލި މަޑުޖެހުނު ނަމަވެސް ލަންކާއިން ވަނީ 2023 ވަނަ އަހަރު ނިމުނުއިރު އެދެވޭފަދަ ކުރިއެރުމެއް ހޯދާފައެވެ. އެގޮތުން އެއަހަރު ލަންކާއަށް ވަނީ 1.4 މިލިއަން ފަތުރުވެރިން ޒިޔާރަތްކޮށްފައެވެ.

މިއަހަރުގެ ޑިސެމްބަރުމަހުގެ 29 ގެ ނިޔަލަށް ލަންކާއަށް ވަނީ، 2,037,960 ޓޫރިސްޓުން ޒިޔާރަތްކޮށްފައެވެ. މިއީ ދިވެހިރާއްޖެއަށްވުރެ 3،737 ފަތުރުވެރިންގެ އިތުރުވުމެކެވެ. މި މުއްދަތުގެ ތެރޭގައި ރާއްޖެއަށް ޒިޔާރަތްކޮށްފައިވަނީ، 2،034،223 ފަތުރުވެރިންނެވެ. ޓޫރިޒަމް ސިނާއަތުގައި މިހާރު ލަންކާއަކީ ރާއްޖެއާ ވާދަވެރި ގައުމެކެވެ. މިދިޔަ އަހަރުގެ ނިޔަލަށް ރާއްޖޭގެ އެއްވަނަ މާކެޓަކީ އަވައްޓެރި އިންޑިއާއެވެ. ނަމަވެސް މިއަހަރު އިންޑިއާ ވެފައިވަނީ ލަންކާގެ އެއްވަނަ ޓޫރިޒަމް މާކެޓަށެވެ.