ކުދިކުދި ކުށްތަކުގައި 100 އަށްވުރެ ގިނަ ފަހަރު ހައްޔަރު ކޮށްފައިވާ މީހަކު އަނެއްކާވެސް ހައްޔަރު ކޮށްފިއެވެ.
އެގޮތުން ހައްޔަރު ކޮށްފައިވަނީ ނ. މިލަދޫ ސޯސަންގެ މުހައްމަދު ނައުޝާދެވެ. މިފަހަރު އޭނާ ހައްޔަރު ކުރެވުނޫ ވައްކަމުގެ މައްސަލައެއްގައެވެ. ނަމަވެސް އެ ތުހުމަތަށް އޭނާ އިންކާރުކޮށްފައި ވާކަމަށް ބަންދު އަމުރުގައިވެއެވެ.
ނައުޝާދުގެ ބަންދު އަމުރުގައި ބުނެފައިވާ ގޮތުން، އޭނާ ވަނީ ކުދި ކުދި ކުށްތަކުގައި 100 އަށްވުރެ ގިނަ ފަހަރު ހައްޔަރު ބަންދު ކޮށްފައެވެ.
ކްރިމިނަލް ކޯޓުގެ ގާޒީ މިސްބާހު ކުރިން ފާހަގަކުރައްވާފައިވާ ގޮތުގައި ނައުޝާދަކީ ތަކުރާރުކޮށް މަސްތުވާތަކެތި ބޭނުންކުރުމާއި ވައްކަމާއި އެ ބާވަތުގެ އެކިއެކި ކުދިކުދި ކުށްތަކަށް އަރައިގަންނަމުންދާ މީހެކެވެ.
"އާއްމު ޖިނާއީ ނިޒާމުގެ ތެރެއިން މިހާރު އަމަލު ކުރަމުންދާ ގޮތަށް ދައުވާކޮށްފައި އަދަބު ކަނޑައެޅިކަމުގައިވީ ނަމަވެސް މިއީ އެފަދަ މީހުން އިސްލާހުވުމަށް ބާރު އެޅޭ ފަދަ އަދަބެއް ކަމުގައި ނުވޭ" ގާޒީ މުހައްމަދު މިސްބާހު ކުރިން ވިދާޅުވެފައިވެ އެވެ.
އެހެންކަމުން އެފަދަ މީހުންނަކީ މުޖުތަމައުން އެކަހެރިކޮށް އިސްލާހުކުރުމުގެ ނިޒާމެއްގެ ތެރެއަށް ވެއްދުމަށްފަހު، އިސްލާހުވެ މުޖުތަމައަށް ފައިދާހުރި މަސައްކަތެއް ދަސްކުރުމަށްފަހު އަމިއްލަ ދިރިއުޅުމެއް އުޅެން ތައްޔާރުވުމުން ނޫނީ އަލުން މުޖުތަމައަށް ދޫނުކުރެވޭނެ މީހުން ކަމަށް ދެކެވަޑައިގަންވާ ކަމަށް ގާޒީ ވިދާޅުވެފައިވެއެވެ.
މިފަހަރު ނައުޝާދުގެ ބަންދަށް އިސްގާޒީ އާދަމް މުހައްމަދު ވަނީ 15 ދުވަސް ޖަހާފަ އެވެ.
Advertisement
This content is created and paid for by advertisers and does not involve Voice Journalists
