މި އަހަރުގެ ނޮވެމްބަރު މަހު ނިއުދިއްލީގައި އޮންނަ 45 ވަނަ އިންޑިއާ އިންޓަނޭޝަނަލް ޓްރޭޑް ފެއާގައި ރާއްޖޭގެ ވިޔަފާރިތަކަށް ބައިވެރިވުމުގެ ފުރުސަތު ހުޅުވައިލައިފިއެވެ.
އިންޑިއާ ސަރުކާރުން އިކޮނޮމިކް މިނިސްޓްރީއާ ހިއްސާކުރި ގޮތުގައި ނޮވެމްބަރު 14 އިން 27 އަށް ކުރިއަށް ގެންދާ މި ފެއާގައި ދިވެހި ކުންފުނިތަކާއި ސިނާއީ ދާއިރާގައި މަސައްކަތްކުރާ ފަރާތްތައް ބައިވެރިވުމަށް ފެއާ އިންތިޒާމުކުރާ ފަރާތުން ދަޢުވަތު ދީފައިވެއެވެ.
ބައިނަލްއަޤުވާމީ ވިޔަފާރީގެ ގުޅުންތައް ބަދަހިކުރުމުގެ މަޤުޞަދުގައި ބާއްވާ މި މައުރަޒަކީ އުފެއްދުންތަކާއި ޚިދުމަތްތައް އިޝްތިހާރުކުރުމާއި އިންވެސްޓްމަންޓުގެ ފުރުޞަތުތައް ފަހިކޮށްދިނުމާއި ދުނިޔޭގެ އެކި ކަންކޮޅުތަކުގެ އިންވެސްޓަރުންނާއި ޓެކްނޮލޮޖީ ފޯރުކޮށްދޭ ފަރާތްތަކާ ގުޅުން ޤާއިމުކުރެވޭ ޕްލެޓްފޯމެކެވެ.
ފެއާގައި ބައިވެރިވާން ޝައުޤުވެރިވާ ފަރާތްތަކުން ފެއާ އިންތިޒާމުކުރާ ފަރާތުގެ ރަސްމީ ވެބްސައިޓް މެދުވެރިކޮށް އޮންލައިން އެޕްލިކޭޝަން ފުރިހަމަކުރުމަށްފަހު އެ މަޢުލޫމާތު އެ ވުޒާރާއަށް އީމެއިލް ކުރުމަށް އެ ވުޒާރާއިން އެދިފައިވެއެވެ.
އިންޑިއާ އިންޓަނޭޝަނަލް ޓްރޭޑް ފެއާއަކީ 1980 ވަނަ އަހަރުން ފެށިގެން ކޮންމެ އަހަރަކު ނިއުދިއްލީގެ ޕްރަގަތީ މައިދާން ކޮމްޕްލެކްސްގައި ބާއްވަމުން އަންނަ ދެކުނު އޭޝިއާ ސަރަޙައްދުގެ އެންމެ ބޮޑު އެއް ވިޔަފާރި މައުރަޒެވެ.
އިންޑިއާ ޓްރޭޑް ޕްރޮމޯޝަން އޯގަނައިޒޭޝަން (އައިޓީޕީއޯ) އިން އިންތިޒާމުކުރާ މި ފެއާގައި ކޮންމެ އަހަރަކު ވެސް ގިނަ ޢަދަދެއްގެ ޤައުމުތަކުން ބައިވެރިވެ ވިޔަފާރީގެ ގުޅުންތައް ބަދަހިކޮށް އެއްބާރުލުން އިތުރުކުރުމުގެ ފުރުޞަތު ހޯދައެވެ.
Advertisement
This content is created and paid for by advertisers and does not involve Voice Journalists
