ކުޑަކުއްޖަކާ ޖިންސީ ގުޅުން ހިންގި މީހެއްގެ މައްޗަށް ދައުލަތުން އުފުލި ތިން ދައުވާއެއްގެ ތެރެއިން ދެ ދައުވާ ސާބިތުވެ ޖުމްލަ 25 އަހަރުގެ ޖަލު ހުކުމެއް އިއްވައިފި އެވެ.
ޑިސެންބަރު 17، 2020 ގައި ކުރިމިނަލް ކޯޓަށް ހުށަހެޅި މި މައްސަލާގައި ދައުވާކޮށްފައިވާ ނަސްރުالله ފާއިޒު ކިޔާ މީހެއްގެ މައްޗަށެވެ.
އޭނާގެ މައްޗަށް އުފުލާފައިވާ ދައުވާތަކަކީ:
ދިވެހިރާއްޖޭގައި އޮރިޔާންކާޑު ގެންގުޅުމުގެ ކުށުގެ ދައުވާ
ކުޑަކުއްޖަކު އިތުބާރުކުރަންޖެހޭ މަޤާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށުގެ ދައުވާ
ޖިންސީ ނިޔަތެއް އޮވެގެން ކުޑަކުއްޖެއްގެ ހަށިގަނޑުގައި އަތްލުމުގެ ކުށުގެ ދައުވާ
މި ތިން ދައުވާގެ ތެރެއިން އޮރިޔާންކާޑު ގެންގުޅުގެ ކުށުގެ ދައުވާ ފިޔަވައި ދެން ކުރެވުނު ދެ ދައުވާ ނަސްރުالله ގެ މައްޗަށް ސާބިތުވެފައިވާއިރު، އޮރިޔާންކާޑު ގެންގުޅުމުގެ ދައުވާ ސާބިތު ނުވީ، އެކަށީގެންވާ ސާބިތުކުރެވޭ މިންވަރަށް ހެކި ނެތުމުން ކަމަށް ހުކުމުގައިވެއެވެ.
މި މައްސަލާގައި ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރެ، އެ ކުއްޖަކާމެދު ޖިންސީ އަމަލެއް ހިންގުމުގެ ކުށް ސާބިތުވުމުން ނަސްރުاللهގެ މައްޗަށް އިއްވާފައިވަނީ 15 އަހަރުގެ ޖަލު ހުކުމެކެވެ.
އަދި ޖިންސީ ނިޔަތެއް އޮވެގެން ކުޑަކުއްޖެއްގެ ހަށިގަނޑުގައި އަތްލިކަން ސާބިތުވުމުން އިއްވާފައިވަނީ ދިހަ އަހަރުގެ ޖަލު ހުކުމެކެވެ.
މި މައްސަލަ އަކީ ކުޑަކުދިންނާއި ގުޅުންހުރި މައްސަލައެއް ކަމަށްވުމުން، ނަސްރުالله ގެ ރަށާއި އަތޮޅު އަދި މައްސަލައިގެ ތަފްސީލް ހާމަކޮށްފައެއް ނުވެއެެވެ.
Advertisement
This content is created and paid for by advertisers and does not involve Voice Journalists
