ސިޔާސީ މަގާމުތަކުގައި ތިބެގެން ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ހައި ކޯޓުން ނިންމި ނިންމުމެއް ސުޕްރީމް ކޯޓުގައި އިސްތިއުނާފުކުރުމަށް ފަހު މައްސަލަ އަނބުރާ ނަގައިފި އެވެ.

އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލެއް ހިންގި މައްސަލައެއް ރައްދުވާ މީހެއްގެ ގާނޫނީވަކީލުގެ ހައިސިއްޔަތުން, އެންވަޔަރަމަންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު ރާގިބު އަހްމަދު ކޯޓުގައި ވަކާލާތު ކުރައްވާތީ، ދައުލަތުގެ މަގާމެއް ފުރުއްވަމުންދާ ބޭފުޅެއް، ދައުލަތާއި ދެކޮޅަށް އެފަދަ މައްސަލައެއްގައި ވަކާލާތު ކުރުމަކީ މަސްލަޙަތު ފުށުއެރުމަށް ކަމަށް ބުނެ، އެކަމާ ދެކޮޅަށް ޕްރޮސެކިއުޓާ ޖެނެރަލްގެ ފަރާތުން އިއުތިރާޒު ކުރުމުން ހައިކޯޓުން ނިންމީ، ރައީސް އައްޔަންކުރާ ސިޔާސީ މަގާމެއްގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށެވެ.

މިދިޔަ ނޮވެމްބަރު މަހު ރާގިބު ވަނީ އެ މައްސަލަ ސުޕްރީމް ކޯޓުގައި އިސްތިއުނާފު ކޮށްފައެވެ. ނަމަވެސް މިހާރު އެ ކޯޓުގެ ރަޖިސްޓްރީން އެ ފެންނާކަށް ނެތެވެ.

Advertisement

އެކަމާއި ގުޅިގެން ރާގިބު ވިދާޅުވީ އެ މައްސަލަ އަނބުރާ ގެންގޮސްފައިވާ ކަމަށެވެ. 

ސިޔާސީ މަގާމުގައި ހުރެގެން ދައުލަތާ ދެކޮޅަށް ވަކާލާތު ކުރުމާއި ގުޅޭ މައްސަލަ އަނބުރާ ގެންގޮސްފައި ވާއިރު، ރައީސް އޮފީހާ ދެކޮޅަށް، ގދ. ތިނަދޫގައި 10،000 މީހުން ހަމަނުވަނީސް ސިޓީއެއްގެ ދަރަޖަ ދިނުމަށް ނިންމާފައިވާ ނިންމުން ބާތިލްކުރަން އެދި ރާގިބު ހައި ކޯޓަށް ދުސްތޫރީ މައްސަލައެއް ހުށަހެޅުއްވުމުން އޭނާ ވަނީ މަގާމުން ވަކިކޮށްފަ އެވެ. 

އެގޮތުން، މިދިޔަ ނޮވެންބަރު 25ގައި ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވެފައި އޮތީ، ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ރާގިބު ކޯޓަށް ދިއުމާ ގުޅިގެން، ރައީސުލްޖުމްހޫރިއްޔާ, އޭނާ އެންވަޔަމެންޓް މިނިސްޓްރީގެ ނައިބުކަމުން ވަކިކުރެއްވީ ކަމަށެވެ.