ހައްޖު ކޯޕަރޭޝަނުގެ ފަރާތުން އިންތިޒާމުކުރި ޑިސެމްބަރުމަހުގެ އުމްރާދަތުރުގައި ރެކޯޑް އަދަދަކަށް އުމްރާވެރިން ހިމެނޭއިރު މިފަހަރުގެ އުމްރާ ދަތުރުގެ އެންމެ ހާއްސަކަމަކީ، އާއިލާތަކުގެ ގިނަ އަދަދެއްގެ ކުޑަކުދިން ހިމެނުންކަމަށް ހައްޖު ކޯޕަރޭޝަނުން ބުނެފިއެވެ.

ހައްޖު ކޯޕަރޭޝަނުގެ ޑިސެމްބަރު އުމްރާ ފާހަގަވެގެން ގޮސްފައިވަނީ، މިހާތަނަށް އެއްފަހަރެއްގެ ތެރޭގައި އެންމެގިނަ މީހުން އުމްރާގެ އަޅުކަން އަދާކުރުމަށް ފުރި ދަތުރުގެ ގޮތުގައެވެ. ހައްޖު ކޯޕަރޭޝަނުން ބުނީ ދިވެހިރާއްޖެއިން އެއްވަގުތަކާ އެންމެ ގިނަ ޢުމްރާވެރިން ޢުމްރާގެ މަތިވެރި އަޅުކަން އަދާ ކުރެއްވުމަށް މައްކާގައި ތިއްބެވި މިދުވަސްވަރު ޙައްޖު ކޯރޕަރޭޝަނުން އަންނަނީ 800 އަށް ވުރެ ގިނަ ޢުމްރާވެރިންނަށް ޚިދުމަތް ދެމުންނެވެ. އެ ގޮތުން އެ ކޯޕަރޭޝަނުގެ ހަވާލުގައި މިވަގުތު 822 ޢުމްރާވެރިން ތިބިކަމަށް ހައްޖު ކޯޕަރޭޝަނުން ބުންނެވެ.

ހައްޖު ކޯޕަރޭޝަނުން ބުނީ، މި ފަހަރުގެ ދަތުރުގައި ދިވެހިންނާއެކު، އެ އާއިލާތަނަށް ނިސްބަތްވާ ގިނަ އަދަދެއްގެ ކުޑަކުދިން ބައިވެރިވާކަމީ ދިވެހި ޢާއިލާތަކުން ޙައްޖު ކޯރޕަރޭޝަނަށް އިތުބާރު ކުރާކަމާއި، އެ ކޯޕަރޭޝަނުގެ މަސައްކަތްތައް ބަލައިގަންނަ ކަމުގެ އަލިގަދަ ހެތްކެއް ކަމަށެވެ.

Advertisement

ހައްޖު ކޯޕަރޭޝަނުގެ އުމްރާދަތުރުގެ ތެރެއިން ބޭއްވި ކުޑަކުދިންގެ ހަވީރުގެ ތެރެއިން.. ފޮޓޯ: ހައްޖު ކޯޕަރޭޝަން

ޙައްޖު ކޯރޕަރޭޝަނުން ވަނީ އެހެނިހެން ޢުމްރާ ދަތުރު ތަކެކޭ އެއްފަދައިން މި ދަތުރުގައި ވެސް ދަތުރުގައި ބައިވެރިވާ ކުދިންނަށް ޚާއްޞަ ކޮށްގެން ދީނީ މަޢުލޫމާތު ތަކާއި އެކު ކުޑަކުދިންގެ ހަވީރެއް ކުރިއަށް ގެންގޮސްފައެވެ. ކުޑަކުދިންގެ ދީނީ ހަވީރު ކުރިއަށްގެންގޮސްފައިވަނީ ޙައްޖު ކޯރޕަރޭޝަނުން ސަޢުދިޢަރަބިއްޔާގެ މައްކާގައި ހިފާފައި ހުންނަ އަލަބަލަދުއް ޠައްޔިބް،އަޖްޔާދު ހޮޓަލުގައެވެ.

ހައްޖު ކޯޕަރޭޝަނުގެ ހަވާލުގައި އުމްރާއަށްދިޔަ ފަރާތްތަކަށް އެކުންފުނީގެ ފަރާތުން ފޯރުކޮށްދެމުންދާ ހިދުމަތްތަކާ ގުޅޭގޮތުން ބުނެފައިވަނީ، ހުރިހާ ޢުމްރާވެރިން މައްކާ މަދީނާ އާއި ދެމެދު ދަތުރު ކުރުމުގައި ބޭނުންކުރީ ހައި ސްޕީޑް ރޭލުގައި ކަމަށެވެ. އަދި މިދަތުރުގައި ބައިވެރިވި އަންހެން ފިރިހެން ހުރިހާ ޢުމްރާވެރިންނަށް ރައުޟާ އަށް ވަދެވުނުކަން ހައްޖު ކޯޕަރޭޝަނުން ވަނީ ފާހަގަކޮށްފައެވެ.