ސިނގިރޭޓް ހަދަން ބޭނުންކުރާ ތަކެތި މަނާވި ނަމަވެސް ދުންފަތުގެ އިސްތިއުމާލު ކުރުމުން ދުރުހެލިވާން ބޭނުންކުރާ ތަކެތި މަނާނުވާނެ ކަމަށް ސަރުކާރުން ބުނެފިއެވެ.
ދުންފަތް ކޮންޓްރޯލްކުރުމުގެ ޤާނޫނުގެ ދަށުން ދުންފަތުގެ ބާވަތެއް އުފައްދަން ބޭނުންކުރާ އާލާތެއް އެތެރެކޮށްފިނަމަ އެއެއްޗެއް ހިފަހައްޓައި ނައްތާލުމަށް ސިއްހީ ވުޒާރާއިން ކަސްޓަމްސްއަށް ވަނީ އަންގައިފައެވެ.
އެގޮތުން، ސިއްހީ ވުޒާރާއިން ކަސްޓަމްސްއަށް ފޮނުވާފައިވާ ސިޓީއެއްގައިވާގޮތުން ސިނގިރޭޓް ތައްޔާރުކުރުމަށް ބޭނުންކުރާ ކަރުދާހާއި އެނޫންވެސް ތަކެތި ރާއްޖެ އެތެރެކުރުމަކީ ދުންފަތް ކޮންޓްރޯލް ކުރުމުގެ ގާނޫނުގެ ދަށުން މަނާކަމެކެވެ.
ސިއްހީ ވުޒާރާއިން ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާއަށް ފޮނުވާފައިވާ މި ސިޓީގައި ބުނެފައިވަނީ، ދުންފަތުގެ ބާވަތެއް އުފެއްދުމަކީ މަނާކަމެއްކަމުގައިވާތީވެ، ދުންފަތުގެ އެއްވެސް ބާވަތެއް އުފެއްދުމަށް ބޭނުންކުރާ އެއްޗެއް ނުވަތަ އެއްވެސް އާލާތެއް އެއްވެސް ފަރާތަކުން އެތެރެކޮށްފިނަމަ، އެތަކެތި ހިފަހައްޓައި ނައްތާލުމަށް ދަންނަވާކަމަށެވެ.
އެއާއެކު ބައެއް މީހުން ވަނީ، ދުންފަތުން ދުރުވުމުގެ ފަރުވާގައި ގައިގައި ހިތްޕައިގެން ބޭނުންކުރާ ނިކޮޓިން ޕެޗު ފަދަ ތަކެތިވެސް މަނާވާނެތޯ ސުވާލު އުފައްދައިފައެވެ.
އެކަމާ ގުޅިގެން ސަރުކާރުން ބުނީ ދުންފަތް ކޮންޓްރޯލް ކުރުމާ ބެހޭ ގާނޫނަށް ގެނައި އިސްލާހަށް އަމަލުކުރަން ފެށުމާއެކު، އަމިއްލައަށް ސިނގިރޭޓު ހަދަން ބޭނުންކުރާ ތަކެތި މަނާވެފައިވާ ކަމަށެވެ.
ނަމަވެސް މަނާވާ ތަކެތީގެ ތެރޭގައި ދުންފަތުން ދުރުވުމުގެ ފަރުވާގައި ބޭނުންކުރާ ތަކެތި ނުހިމެނޭނެ ކަމަށާއި އެ ބާވަތްތަކަށް ޑިއުޓީ މާފުވުމުގެ އިތުރުން، އާސަންދަ ނިޒާމުގެ ތެރެއިން ލިބޭނެ ތަކެތި ކަމަށް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
