ދިވެހިރާއްޖެއަށް ދިމާވެފައިވާ މާލީ ގޮންޖެހުންތަކުގައި އިންޑިއާއިން ދެއްވާ އެހީތެރިކަމަށް ދިވެހި ސަރުކާރުން ޝުކުރު އަދާކޮށްފިއެވެ.
ދިވެހިރާއްޖޭގެ ފޮރިން މިނިސްޓަރ ޑރ. އަބްދުالله ޚަލީލް އަދި އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ. އެސް. ޖައިޝަންކަރު މިއަދު ނިއު ދިއްލީގައި ބޭއްވި ރަސްމީ މަޝްވަރާތަކުގެ ހުރިހާ ދާއިރާއަކުން ދެ ގައުމުގެ ދެމެދުގައި ގުޅުން ބަދަހިކުރުމާ ބެހޭގޮތުން މަޝްވަރާކުރައްވާފައި ވެއެވެ.
މީގެ ތެރޭގައި 2024 ވަނަ އަހަރުގެ އޮކްޓޯބަރު މަހު ރައީސް ޑރ. މުޙައްމަދު މުޢިއްޒު އިންޑިއާއަށް ކުރެއްވި ދައުލަތުގެ ދަތުރުފުޅުގައި ދެ ޤައުމުގެ ވެރިން އިސްކަންދެއްވި ދާއިރާތަކާ ބެހޭގޮތުން ވެސް ވާހަކަދެކެވުނެވެ.
މި ބައްދަލުވުމުގައި ދެ މިނިސްޓަރުންވެސް ދެ ޤައުމަށް މުހިންމު ކަންކަމުގައި ދެފަރާތުން އެކުގައި މަސައްކަތްކުރުމަށް އެއްބަސްވެފައިވާއިރު، މިފަދަ މަސައްކަތްތައް ދެ ޤައުމުގެ ގުޅުމުގެ ތެރެއިންނާއި ބައިނަލްއަޤްވާމީ މައިދާނުގައި ކުރިއަށް ގެންދިއުމަށް ވަނީ އެއްބަސްވެފައެވެ.
މީގެ އިތުރުން މި ބައްދަލުވުމުގައި އިޤްތިޞާދީ ގުޅުމާއި، އިންޑިއާގެ ހިލޭ އެހީއާއި ލޯނު އެހީގެ ދަށުން ކުރިއަށްދާ މަޝްރޫޢުތަކުގެ ކުރިއެރުމާ ބެހޭގޮތުން ވެސް މަޝްވަރާކުރެވިފައިވާ ކަމަށާ، ދިވެހިރާއްޖެއަށް ދިމާވެފައިވާ މާލީ ގޮންޖެހުންތަކުގައި އިންޑިއާއިން ދެއްވާ އެހީތެރިކަމަށް ދިވެހި ސަރުކާރުގެ ފަރާތުން ވަޒީރު ޝުކުރު އަދާކުރައްވާފައިވެއެވެ.
އަދި އިޤްތިޞާދީ، ވިޔަފާރި އަދި އިންވެސްޓްމަންޓް ގުޅުން ކުރިއެރުވުމުގައި އިންޑިއާއިން އަދާކުރާ ދައުރަށާއި، ދިވެހިރާއްޖޭގެ އިޖްތިމާޢީ އަދި އިޤްތިޞާދީ ތަރައްޤީއަށް އިންޑިއާއިން ކުރާ މަސައްކަތަށް ވަޒީރު ޝުކުރު އަދާކުރައްވާފައިވެއެވެ.
ދެ މިނިސްޓަރުންވެސް ދިވެހިރާއްޖެ އަދި އިންޑިއާގެ ގުޅުން އިތުރަށް ހަރުދަނާކުރުމަށް އިތުރު ފުރުޞަތުތައް ހޯދުމުގެ މުހިންމުކަން ފާހަގަކުރެއްވިއެވެ.
ބައްދަލުވުމަށްފަހު، ދެ މިނިސްޓަރުން ވަނީ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް (އެޗްއައިސީޑީޕީ) އެމްއޯޔޫގައި ސޮއިކުރައްވާފައެވެ. މި އެމްއޯޔޫގެ ދަށުން ރައްޔިތުންނަށް ސީދާ ފައިދާކުރާނެ މަޝްރޫޢުތަކުގެ ތިންވަނަ ފިޔަވަހި ފަށައިގަނެވޭނެވެ ކަމަށް މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
