މިހާރު ކުރަމުޔންދާ ވިއްސާރާގައި ރާއްޖޭގެ ބައެއްރަށްތަކުގައި ފެންބޮޑުވެ، އެކިވަރުގެ ގެއްލުންތައް ލިބެމުންދާއިރު، މިއީ އެންމެން އެކަތިގަނޑަކަށްވެ، މަސައްކަތްކުރަންވީ ވަގުތުކަމަށް އިދިކޮޅު އެމްޑީޕީގެ ރައީސް އަދި ކުރީގެ ހާރިޖީ ވަޒީރު ޢަބްދުﷲ ޝާހިދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ރާއްޖޭގެ ބޮޑުބަޔަކަށް ގަދަވަޔާއެކު ކުރަމުންއަންނަ ވިއްސާރާގައި ރަށްތަކަށް ބޮޑެތި ގެއްލުންތައް ލިބި އާންމު ދިރިއުޅުން ގިނަ ރަށްރަށުގައިވަނީ ހުއްޓުމަކަށް އައިސްފައި ކަމަށެވެ. ޝާހިދު ވިދާޅުވީ، ރައްޔިތުން މިއަދު ތަޙައްމަލް ކުރަމުންދާ ހިތާމައިގައި އެމަނިކުފާނުވެސް ބައިވެރިވާކަމަށެވެ.

އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި ކައުންސިލު ތަކާއި، އެހެނިހެން އިދާރާތައް ގުޅިގެން ކުރެވޭ މަސައްކަތުގައި އެންމެން ބައިވެރިވެ، އެއްބައެއްގެ ގޮތުގައި އެހީތެރިވަމުން ގެންދިއުމަށް އެދޭކަމަށް ޝާހިދު އެކްސްގައި ކުރެއްވި މި ޕޯސްޓުގައި ވިދާޅުވިއެވެ.

Advertisement

ރާއްޖެއަށް މިހާރު ކުރަމުންދާ ވިއްސާރާގައި ބައެއް ރަށްތަކުގައި ވަރަށްބޮޑަށް ފެންބޮޑުވެ، ބައެއް ގެތަކުން މީހުން ބަދަލުކުރަން ޖެހިފައިވާކަމަށް ޑިޒާސްޓާ އޮފީހުން ވަނީ ބުނެފައެވެ. އެންމެބޮޑަށް ފެންބޮޑުވި ރަށްތަކުގެ ތެރޭގައި ހިމެނެނީ ފ.މަގޫދޫ، ކުޑަހުވަދޫ، މީދޫ، ނަރުދޫ، ކ.ގުރައިދޫ، މާމިގިނލި ހިމެނެއެވެ.

މިއަދު ކުރި ވިއްސާރާގައި މާލެއަށް ރެކޯޑް އަދަދަކަށް ވާރޭ ވެހިފައިވާއިރު، މުޅި މާލޭގެ ހުރިހާ މަގެއްގަިއހެން ވަނީ ފެންގަނޑު ބޮޑުވެ، އާއްމު ދަތުރުފަތުރަށްވެސް ހުރަސްއެޅިފައެވެ. މެޓް އޮފީހުން ލަފާކުރާ ގޮތުގައި ކުރިއަށްއޮތް 24 ގަޑިއިރުވެސް ރާއްޖޭގެ ހުރިހާ ސަރަހައްދަކަށްވެސް ވިއްސާރަކުރާނެއެވެ.