ދެކުނު ކޮރެއާގެ ސަސްޕެންޑް ކުރެވިފައިވާ ރައީސް ޔޫން ސުކް-ޔޯލް ހައްޔަރުކުރުމަށް އެގައުމުގެ ފުލުހުން ދިޔުމުން، ފުލުހުންގެ މަސައްކަތަށް ހުރަސްއަޅައި، ޔޫން ހައްޔަރުކުރުން ހުއްޓުވައިފިއެވެ.
މިމަހުގެ 3 ވަނަ ދުވަހު އޭނާ ކުއްލި ގޮތަކަށް މާޝަލް ލޯ އިއުލާނު ކުރުމާއި ގުޅިގެން ޔޫން ހައްޔަރުކުރުމުގެ އަމުރު އެގއުމުގެ ކޯޓުން ނެރެފައިވާއިރު، އިއްޔެގެ ހެނދުނުގެ ވަގުތެއްގައި ފުލުހުންނާއި އިންވެސްޓިގޭޓަރުން ހިމެނޭހެން 80 މީހުންގެ ޓީމެއް ވަނީ އެގައުމުގެ ރިޔާސީ ގަނޑުވަރަށް ވަނުމަށް މަސައްކަތްކޮށްފައެވެ.
މިކަމާއި ގުޅޭގޮތުން އެގައުމުގެ ކޮރަޕްޝަން އިންވެސްޓިގޭޝަން އޮފީސް (ސީއައިއޯ) ގެ އިންވެސްޓިގޭޓަރުން ބުނީ، ތަހުގީގަށް ސުވާލުކުރުމަށް ޔޫން ހައްޔަރުކުރުމަށް ދިޔުމުން ގާތްގަނޑަކަށް 200 ސިފައިންނާއި ރައީސްގެ ސެކިއުރިޓީ ޓީމުން އެމީހުން ހުއްޓުވާފައިވާކަމަށެވެ.
ޔޫން ހައްޔަރުކުރުމަށް އެގައުމުގެ ކަމާބެހޭ އިދާރާތަކުން ދިޔައިރު، އެގައުމުގައި ޔޫންއަށް ތާއީދުކުރާ އާއްމުންވެސް ވަނީ ޔޫން ހައްޔަކުރުމާއި ދެކޮޅަށް އެ ސަރަހައްދުގައި އިހުތިޖާޖުކޮށްފައެވެ.
މިއާއިއެކު، އެންމެންގެ ސަލާމަތާއި ރައްކާތެރިކަމަށްޓަކައި އެގައުމުގެ އިންވެސްޓިގޭޓަރުން މި އަމުރު ތަންފީޒުކުރުން ވަގުތީ ގޮތުން ހުއްޓާލާފައިވާއިރު، ޖެނުއަރީ 6 އާއި ހަމައަށް މުއްދަތް ދީފައިވާ މި އަމުރު އިތުރު ކުރުމުގެ ފުރުސަތުވެސް އެގައުމުގެ ކޯޓުން ދީފައިވާކަން ފާހަގަކޮށްލަން ޖެހެއެވެ.
ގާނޫނު ހަދާ މަޖިލީހުގެ މެމްބަރުންގެ ވޯޓާއިއެކު ޑިސެމްބަރު މަހުގެ 14 ވަނަ ދުވަހުން ފެށިގެން ރައީސްގެ މަގާމުން ޔޫން ސަސްޕެންޑް ކޮށްފައިވާއިރު، އޭނާ މަގާމުން ވަކިކުރެވޭނީ އެގައުމުގެ ދުސްތޫރީ ކޯޓުން މަޖިލީހުގެ މި ނިންމުން ދަމަހައްޓައިފިނަމައެވެ.
ޔޫންގެ ފަހުން އެގައުމުގެ ވަގުތީ ރައީސްކަމާއި ހަވާލުވި ހަން ޑަކް ސޫ ވެސް މަގާމުން ވަކިކޮށްފައިވާއިރު، މިހާރު އެގައުމުގެ ވަގުތީ ރައީސް ކަމާއި، ވަގުތީ ބޮޑު ވަޒީރުކަން ކުރައްވަމުން އަންނަ ޗޮއި ސަންގް މޮކް ވެސް ވަކިކުރާނެ ކަމުގެ އިންޒާރު އެގައުމުގެ ގާނޫނު ހަދާ މަޖިލީހުގައި ތިބި އިދިކޮޅު ފަރާތްތަކުން އަންނަނީ ދެމުންނެވެ.
Advertisement
This content is created and paid for by advertisers and does not involve Voice Journalists
